İşğaldan azad edilən Xocalı rayonunun Ballıca kəndinə bu il bir neçə dəfə köç olub. Sonuncu dəfə martın 14-də “Böyük Qayıdış” proqramı çərçivəsində Ballıcaya 98 nəfərdən ibarət 24 ailə yerləşdirilib.
“Xalq qəzeti"nin müxbiri Mahir Rəsuloğlu da anası və qardaşı ilə birgə Ballıcaya köçənlər arasındadır. Həmkarımız hazırda “Xalq qəzeti"nin bölgə müxbiri kimi fəaliyyət göstərir.
Modern.az-ın əməkdaşı Mahir Rəsuloğlu ilə əlaqə saxlayaraq, onun təəssüratlarını öyrənib.
Jurnalist bildirib ki, o Qarabağa daimi məskunlaşlardan biri kimi yox, işləmək üçün gedib:
“Anamgil, qardaşımgil daimi məskunlaşma üçün köçənlər sırasındadır. Evlər təmir olunur, insanlar bütün vacib infrastrukturla - qaz, su, işıq, sürətli internet xətti ilə təmin olunublar. Ballıca sakinləri 33 ildən sonra öz yurdlarına köçməyin sevincini yaşayırlar. Həyətyanı sahəsində əkinlə, heyvandarlıqla məşğul olanlar, eləcə də arıçılıq edənlər var. İnsanlar köhnə dövrlərdəki kimi, ruh yüksəkliyinə sahibdirlər, burada həyat qaynayır. Kartof, lobya əkirlər. Qardaşımgil də göy-göyərti əkib.
Sanki uzunmüddətli qorxulu yuxudan ayılan insanlar qaldıqları yerdən yenidən davam etməyə başlayıblar".
M.Rəsuloğlunun sözlərinə görə, o, hələ iki il əvvəl Qarabağda jurnalist kimi işləmək üçün müraciət edib:
"Suverenliyimiz və ərazi bütövlüyümüz 2023-cü ildə tam bərpa olunandan sonra böyük həvəslə müraciət etdim ki, burada - Xocalıda jurnalist olaraq fəaliyyət göstərmək istəyirəm. Azad vətən torpağında işləməkdən gözəl nə ola bilər?! Buranın havasını udub suyunu içdikcə, adam rahatlayır. Anamgil Gəncədə, mən Bakıda məskunlaşmışdım. Anam Gəncədə yaşayanda qardaşım gündə 3-4 dəfə onun təzyiqini ölçürdü, çünki narahat idi. Artıq 4 aydır ki, buradadır, bəlkə heç 4 dəfə təzyiqi qalxmayıb. Ballıcaya 130 ailə köçüb, yaxın vaxtlarda 30 ailə də bura yerləşəcək. Burada sürətlə bərpa-quruculuq işləri görülür”.
"Öz yurdlarına qayıdan keçmiş məcburi köçkünlərə evlərin çıxarışları da verilirmi" sualına M.Rəsuloğlu belə cavab verib:
"Bu, mənim cavab verə biləcəyim sual deyil, amma bildiyim qədəri ilə birinci mərhələdə müəyyən müddətli müqavilə imzalanır. Keçmiş məcburi köçkünlər müvvəqqəti yerləşdiriləndə onlara müqavilə ilə evlər verilmişdi. Bu suala yəqin ki, Prezidentin Xüsusi Nümayəndəliyi və ya Qaçqınların və Məcburi Köçkünlərin İşləri üzrə Dövlət Komitəsi daha dəqiq fikir bildirə bilər. Amma mənim bildiyim qədərilə burada məskunlaşdırılan sakinlər “kupça” ilə təmin olunacaq, lakin bunun üçün müəyyən vaxt lazımdır. Köçən kimi "kupça" ilə təmin olunmurlar. Müəyyən müddətli müqavilə imzalayıblar, onlar burada yaşamalıdırlar. Qarabağın dirçəlişində iştirak etməlidirlər. Müəyyən müddətdən sonra evlərin sənədləri veriləcək. Anama verilən ev onun adınadır, müqavilə imzalayıb. Müqavilənin müddəti barədə sizə dəqiq deyə bilməyəcəm. Amma bunlar zamanla həll olunası məslələdir. Ən əhəmiyyətlisi odur ki, ermənisiz Qarabağda yaşayırıq, işləyirik".
Mahir Rəsuloğlu Xocalının ilk yazıçısısı olduğunu və yaradıcılığını burada davam etdirdiyini də bildirib.
