2025-ci ildə Türk Dövlətləri Təşkilatının (TDT) iki sammitinin keçirilməsi nəzərdə tutulub. Bunlardan biri rəsmi sammitdir və Azərbaycanda keçirilməsi nəzərdə tutulub. Qeyri-rəsmi sammit isə Macarıstanda keçiriləcək.
Qeyd edək ki, TDT Sammitinin ildə iki dəfə keçirilməsi təşəbbüsü Azərbaycan tərəfindən irəli sürülüb. Bu barədə Prezident İlham Əliyev ötən gün Bakıda keçirilən konfrans zamanı bildirib.
"Biz ötən yay Şuşada ilk qeyri-formal Zirvə toplantısına başladıq, çünki həmkarlarıma dedim ki, ildə bir dəfə toplaşmaq kifayət deyil. Gəlin ildə iki sessiya keçirək. Beləliklə, həmin təşəbbüs dəstəkləndi və artıq ənənə mövcuddur. Ola bilsin, gələn ay görüş olsun. Tarixlər hələ müəyyən edilməyib. Lakin, çox güman ki, gələn ay ikinci qeyri-rəsmi Zirvə görüşümüz olacaq və sonra isə Azərbaycanda rəsmi Zirvə toplantısı keçiriləcək", - Prezident qeyd edib.
Azərbaycanda sammitin Laçında keçiriləcəyi barədə xəbərlər yayılıb. "Gələn ay Laçında TDT Sammiti keçiriləcək və burada Türkiyə və Azərbaycanın türk dünyasının birliyi və əməkdaşlığı məsələlərində güclü həmrəylik nümayiş etdirdiyini bir daha görəcəyik", - Türkiyə Prezidentinin baş müşaviri Çağrı Ərhan yerli mətbuata müsahibəsində deyib.
Onu da qeyd edək ki, Laçın Beynəlxalq Hava Limanının bu il istismara verilməsi gözlənilir. Ötən günlərdə sosial şəbəkələrdə hava limanında təyyarələrin gəldiyi barədə görüntülər yayılıb.
Beləliklə, Laçın Beynəlxalq Hava Limanının ilk xarici qonaqları Türk Dövlətləri Təşkilatının (TDT) sammitində iştirak edəcək liderlər ola bilər.
Modern.az-a açıqlamasında Milli Məclisin Laçını təmsil edən deputatı Rövşən Muradov da bu ehtimalı istisna etməyib.
O deyib ki, TDT Sammitinin keçirilməsi möhtəşəm bir tədbir olacaq:
"Azərbaycan beynəlxalq forumların keçirilməsində son zamanlar olduqca aktivdir. Türk Dövlətləri Təşkilatı ölkələri ilə münasibətlərimiz dinamik inkişaf edir. İnşallah, may ayında Laçın beynəlxalq hava limanı istifadəyə veriləcək. Düşünürəm ki, Türk Dövlətləri Təşkilatının (TDT) Laçında keçiriləcək sammiti hava limanının açılışından sonra baş tuta bilər. Belə bir şey gözləniləndir. Bizim qonaqlar əvvəl Füzulidəki hava limanına eniş edib oradan maşınlarla Laçına gedirdilər. İndi qonaqlarımızın hamısı birbaşa təyyarə ilə Laçın hava limanına enəcəklər. Möhtəşəm bir tədbir olacaq. Yəqin ki, sammit aeroportun açılışından sonra olacaq. Mənim bununla bağlı dəqiq məlumatım yoxdur, amma sammit may ayına təsadüf edəcəksə, bu cür də olacaq".
Deputat vurğulayıb ki, TDT ölkələrinin burada sammit keçirməsi Laçının inkişaf səviyyəsini göstərəcək:
"Məlum olduğu kimi Laçın Qarabağa açılan qapıdır, Ermənistanla sərhəddə olan rayondur. Bu tədbirlərin Laçında keçirilməsi möhtəşəm hadisədir, Azərbaycanın inkişaf səviyyəsini göstərir, Laçının dövlət proqramına uyğun inkişafını göstərir. Bu cür tədbirlərin bundan sonra da işğaldan azad olunmuş ərazilərimizdə keçirilməsi bir daha Azərbaycanın dünyada hansı səviyyədə bir ölkə olduğunu, sülhsevərliyini göstərir".
