İşğaldan azad edilmiş, lakin tikintisi aparılmayan kəndlərdə vəfat edənlərin dəfninə icazə verilsin.
Modern.az xəbər verir ki, yazıçı Tağı Türk işğaldan azad edilmiş torpaqlarla bağlı cəmiyyətin diqqətini cəlb edən humanitar təşəbbüslə çıxış edib. O, hələlik tikinti və məskunlaşma prosesi başlamayan kəndlərdə – xüsusilə də insanların doğulduqları, ailə məzarlarının olduğu yurd yerlərində – dünyasını dəyişmiş şəxslərin dəfninə rəsmi icazə verilməsinin vacibliyini vurğulayıb.
Tağı Türk bildirib ki, bu məsələ təkcə fiziki məkanla bağlı deyil, həm də insanların mənəvi bağlılığı və milli kimliyinin bir hissəsidir:
“Kəndlərimiz azaddır, amma hələ tikintisi aparılmayıb. İnsanlarımız isə bu torpaqlara qovuşmaq üçün illərlə həsrət çəkib. Ən azı doğma kəndində dəfn olunmaq haqqı tanınmalıdır. Bu, nəinki insani, həm də dini və milli borcdur”.
Yazıçı əlavə edib ki, bu cür yanaşma həm də bölgələrin tarixi yaddaşını qorumağa, ailə köklərinin yerindəcə yaşamasına xidmət edərdi.
