Prezident İlham Əliyev ötən gün "İşğaldan azad olunmuş ərazilərdə şəhərsalma məsələləri haqqında" 12 avqust 2021-ci il tarixli fərmanında dəyişiklik edib. Fərmana əsasən, Dövlət Şəhərsalma və Arxitektura Komitəsi yanında Qarabağ Regional Memarlıq və Şəhərsalma Baş İdarəsi Bərdədən Xankəndiyə köçürüləcək.
İdarənin fəaliyyəti Xankəndi şəhərini və Ağdərə rayonunu əhatə edəcək.
Bu kontekstdə digər idarələrin də Xankəndiyə, eləcə də Qarabağın digər bölgələrinə köçürülməsi məsələsi gündəmə gəlir.
Modern.az digər qurumların köçürülməsi məsələsinə münasibət öyrənmək üçün Qarabağı təmsil edən deputatlarla həmsöhbət olub.
Xocalınının deputatı Elman Məmmədovun sözlərinə görə, mümkündür ki, bəzi digər idarələr də Xankəndidə yerləşdirilsin, amma bu, bütün regional qurumların yalnız bir mərkəzdə - istər Xankəndi, istərsə də digər şəhərdə (Şuşa və ya Ağdam) cəmləşdirilməsi baxımından məqsədəuyğun deyil. O bildirib ki, burada təkcə idarəetmə məsələləri deyil, həmçinin iş yerləri, mənzil təminatı kimi vacib sosial faktorlar da nəzərə alınmalıdır.
“Mən hesab edirəm ki, təkcə regional strukturların deyil, digər sahələrə aid qurumların da bölgələrdə yerləşməsi daha səmərəli olar. Məsələn, hazırda ölkənin bütün nazirliklərinin, universitetlərinin böyük əksəriyyəti, eyni zamanda respublika əhəmiyyətli komitələr Bakıda cəmləşib. Bu da paytaxtın həddindən artıq yüklənməsinə səbəb olur. Nəticədə isə mənzil çatışmazlığı, tələbələrin yataqxana ilə təminatı, iş yerlərində sıxlıq, küçələrdə nəqliyyat tıxacları kimi problemlər ortaya çıxır.
Əgər biz 21-ci əsrin çağırışlarını və sosial ehtiyacları nəzərə alsaq, bu problemlərin həlli yollarından biri də məhz regional idarələrin yaradılması ilə yanaşı, onların fəaliyyətinin bölgələrə paylanmasıdır. Bir sıra nazirlik, komitə və ali təhsil müəssisələrinin regionlarda yerləşməsi və orada fəaliyyət göstərməsi həm əhalinin işlə təminatı, həm mənzil məsələləri, həm də ümumilikdə bölgələrin inkişafı baxımından vacibdir”.
Deputat həmçinin vurğulayıb ki, hazırda Prezidentin sərəncamı ilə bəzi regional idarələr Xankəndidə yerləşdirilib:
“Yəqin ki, yaxın gələcəkdə digər idarələrin də köçürülməsi nəzərdə tutulur. Lakin bu məsələdə mərkəzləşmədən daha çox idarələrin bölgələr üzrə balanslı şəkildə yerləşdirilməsi məqsədəuyğundur.
Məsələn, Ağdam rayonunun inkişafı sürətlə davam edir. Ağdam Sənaye Parkı yaradılıb, şəhərdə genişmiqyaslı abadlıq və quruculuq işləri aparılır. Artıq Xıdırlı və Sarıcalı kəndlərinə köç başlayıb. Güman ki, yaxın illərdə Ağdam şəhərinə də kütləvi köç olacaq. Bu baxımdan Ağdamda da müəyyən idarə və nazirliklərin, komitələrin filiallarının açılması məqsədəuyğun olar”, - deyə E.Məmmədov bildirib.
Füzuli rayonunun deputatı Vüqar Bayramov isə qeyd edib ki, Qarabağda yenidənqurma və bərpa işləri davam etdikcə və genişləndikcə, bu proseslər idarəetmə sahəsində də yeni yanaşmaların tətbiq olunmasını zəruri edir:
“Xüsusilə nəzərə alsaq ki, Xankəndi infrastruktur baxımından böyük potensiala malikdir, bu istiqamətdə atılan addımlar olduqca əhəmiyyətlidir. Artıq şəhərdə universitetin fəaliyyətə başlaması, investisiyaların cəlb olunması və digər sosial-iqtisadi layihələrin həyata keçirilməsi Xankəndinin regional inkişafda əsas mərkəzə çevrilməsinə səbəb olur.
Bu kontekstdə, yalnız Xankəndinin deyil, Qarabağ iqtisadi rayonunun digər ərazilərinin də bərpa və inkişaf prosesi çərçivəsində canlandırılması istisna deyil. Xankəndidə məskunlaşan və işləyənlərin sayında artım müşahidə olunur, orada dövlət qurumları fəaliyyət göstərməyə başlayıb. Bu da onu göstərir ki, şəhərin mövcud potensialından daha effektiv istifadə etmək mümkündür”.
V.Bayramov onu da əlavə edib ki, bütün bunlar Xankəndidə daha çox idarəetmə strukturlarının formalaşmasına, xidmət sahələrinin genişləndirilməsinə və nəticə etibarilə daha çevik və funksional idarəetmə mexanizmlərinin tətbiqinə gətirib çıxara bilər:
“Beləliklə, yenidən qurulan və inkişaf edən Qarabağda idarəetmə ilə bağlı yeni yanaşmaların və mexanizmlərin tətbiqi artıq gündəmdədir və bu, bölgənin gələcək inkişafı baxımından mühüm əhəmiyyət daşıyır”.
