Bugünkü tədbirin keçirilməsinə gösrə Sahibə xanım Qafarovaya, Fazil müəllimə dərin minnətdarlığımı bildirirəm. Ümumiyyətlə son iki ildə Qərbi Azərbaycana qayıdış məsələsinə ən böyük dəstək Milli Məclis tərəfindən göstərilib. Müxtəlif komitələr tərəfinfən 5, Milli Məclisin Təşəbbüs Qrupu tərəfindən isə 1 ictimai dinləmə keçirilib.
Modern.az xəbər verir ki, bunu parlamentin İctimai birliklər və dini qurumlar komitəsində keçirilən “Qərbi Azərbaycana qayıdış prosesində QHT-lərin rolu” mövzusunda ictimai dinləmə zamanı Qərbi Azərbaycan İcmasının sədri Əziz Ələkbərli deyib.
O qeyd edib ki, bu dinləmələrdə səsləndiriklən fikirlər qayıdış məsələsində yeni ideyalar verir:
"QHT-lərin də bu məsələdə rolu önəmlidir. Onların vətəndaş cəmiyyətinin formalaşdırılmasında, layihələr əsasında təlimlər, tədbirlər keçirir və əhali arasında maarifləndirmə işi aparırlar. Vaxtilə ermənilərin və onların havadarlarının səyi nəticəsində əhaliyə məlumat verilmirdi. Buna görə də yeni nəsillər belə xəbərsiz yetişmişdi. Bundan istifadə edən ermənilər azərbaycanlılara qarşı deportasiya, soyqırımı həyata keçirmişdi. Nəhayət 2020-ci ilin sentyabrında buna son qoyuldu. Cənab Prezidentin uzaqgörənliyi, xalq-iqtidar birliyi 44 gündə düşmənin iki yüz illik planını pozdu. 24 dekabr 2022-ci ildə tarixçi çıxışında Azərbaycan dövlətinin və xalqının yeni ideyasını elan etdi. Bu məsələdə də QHT-lərimiz öz sözünü deməlidir. Ölkə daxilində və xaricində lazımi fəaliyyəti olan QHT ordusu durur. Yetər ki, bu ordu doğru istiqamətlənsin. QHT Agentliyi ilk gündən böyük iş görülmüş qrant layihə həyata keçirib. Təşəkkür edirik”,- o deyib.
Komitənin sədri Fazil Mustafa isə bildirib ki, Qərbi Azərbaycana qayıdış məsələsinin APA kimi platformada təsdiqi böyük uğur sayılır:
“Bildiyiniz kimi, bu günlərdə Bakıda Asiya Parlament Assambleyasının 15-ci sessiyası keçirildi. Qürurla vurğulamaq istərdim ki, Assamleyanın yekun sənədi olan Bakı Bəyyanəməsində soydaşlarımızın Qərbi Azərbaycana ləyqaətli qayıdış məsələsi öz əksini tapıb. Öz yurdlarından qovulmuş azərbaycanlıların qayıdışı üçün bütün səyləri səfərbər edirik. Bu ideyanın belə bir platformada təsdiqi böyük uğur sayılır”, - deyə komitə sədri bildirib.
Qeyri-Hökumət Təşkilatlarına Dövlət Dəstəyi Agentliyinin icraçı direktoru Aygün Əliyeva bildirib ki, indiyə qədər Qərbi Azərbaycanla bağlı 53 layihə Agentliyin maliyyə dəstəyi ilə icra olunub: “Bu layihələrə ümumilikdə 667 min manat vəsait ayrılıb. Bu il BMT-nin İnsan Hüquqları Şurasının növbəti sessiyasında Qərbi Azərbaycanla bağlı yan tədbir keçiriləcək"
O qeyd edib ki, artıq Qərbi Azərbaycan mövzusu beynəlxalq leksikonda və beynəlxalq gündəlikdə tez-tez çəkilən məsələlərdən biridir.
"Agentlik ilk dəfə 2023-cü ildən başlayaraq Qərbi Azərbaycana qayıdış konsepsiyasının icrasına ictimai dəstəyin göstərilməsi iə bağlı qrant müsabiqə elan etmişdi. Bu müsabiqədə 24 layihə qalib elan olunmuşdu və ümumilikdə 485 min 500 manat qrant ayrılmışdı. 2024-cü ildə də mövzu öz aktuallığını saxlayıb və mövzu üzrə 29 layihəyə 374 min 50 manat vəsait ayrılmışdı".
