Bir müddət əvvəl Milli Məclisdə “Qərbi Azərbaycana qayıdış prosesində QHT-lərin rolu” adlı ictimai dinləmə keçirildi. Bu kontekstdə Modern.az saytı Qərbi Azərbaycana qayıdışla bağlı təkliflə çıxış edib. Təklif növbəti ictimai dinləmənin Kəlbəcərdə keçirilməsi ilə bağlıdır. Kəlbəcər coğrafi olaraq Qərbi Azərbaycana ən yaxın bölgələrdən biri olduğu üçün burada keçirilən ictimai dinləmə yalnız mənəvi deyil, həm də praktik əhəmiyyət daşıyacaq. Kəlbəcər müzakirələri zamanı Qərbi Azərbaycana qayıdış prosesinin yeni aspektləri - məsələn logistik və təhlükəsizlik məsələləri daha dərindən təhlil edilə bilər. .
Modern.az-ın təklifi Milli Məclisin deputatı, Qərb Azərbaycan İcmasının sədri Əziz Ələkbərli tərəfindən bəyənilib. O, saytımıza açıqlamasında bildirib ki, Kəlbəcərdə ictimai dinləmə keçirilməsi ilə bağlı təklif başadüşüləndir:
"Milli Məclisdə Qərbi Azərbaycana qayıdışla bağlı ictimai dinləmələrin keçirilməsi artıq ənənəyə çevrilib. Bu günə qədər 7 belə dinləmə keçirilib və həmin dinləmələrdə problemin müxtəlif aspektləri deputatların, Qərbi Azərbaycan İcmasının rəhbər şəxslərinin və ictimaiyyət nümayəndələrinin, ekspertlərin iştirakı ilə geniş müzakirə olunub. Modern.az-ın növbəti ictimai dinləmələrdən birinin Kəlbəcərdə keçirilməsi ilə bağlı təklifi başadüşüləndir. Niyə də ki yox? Əlbəttə, bunun üçün Kəlbəcərdə müvafiq infrastruktur, şərait olacağı təqdirdə bu təklif mütləq İcmamız tərəfindən nəzərdən keçiriləcək. Artıq xeyli vaxtdır ki, Azərbaycanımızın müxtəlif bölgələrində belə tədbirlər keçirilir. Hazırda biz Xankəndidəki Qarabağ Universitetində belə bir tədbirin keçirilməsini planlaşdırırıq".
İcma sədri Modern.az-ın Qərbi Azərbaycana qayıdış prosesində medianın rolunun artırılması ilə bağlı təklifinə də reaksiya verib:
"Bu, ilk gündən bizim diqqət mərkəzimizdə olan məsələdir. Aydındır ki, qayıdış prosesinin beynəlxalq səviyyədə tanıdılması və ictimai rəyə təsir üçün media əsas vasitələrdən biridir. İnanmıram ki, kim isə bunu inkar edə. O ki qaldı Milli Məclisin müvafiq komitəsində “Qərbi Azərbaycana qayıdış prosesində medianın rolu” mövzusunda ictimai dinləmə keçirilməsi məsələsinə, əlbəttə, bu da mümkündür və elə hesab edirəm ki, biz bu məsələni Milli Məclisin müvafiq strukturları ilə müzakirə edəcəyik. Əmin olun ki, bu mövzuda ictimai dinləmə keçiriləcəyi təqdirdə, əvvəlki dinləmələrdə olduğu kimi, jurnalistlər, media ekspertləri, dövlət rəsmiləri, QHT nümayəndələri mütləq iştirak edəcəklər".
