Ermənistan Azərbaycana dəmir yolu ilə yükdaşıma probleminin həlli ilə bağlı təklif təqdim edib.

Modern.az xəbər verir ki, bu barədə Ermənistanın baş nazirinin ofisinin bəyanatında deyilir.

“Ermənistan Respublikası 2025-ci ilin yanvarında Azərbaycanın qərb rayonlarından Ermənistan Respublikasının ərazisi ilə Naxçıvan Muxtar Respublikasına, əks istiqamətdə və üçüncü ölkələrə, Ermənistan Respublikasının şimal-qərb rayonlarından Azərbaycan Respublikasının ərazisindən keçməklə, o cümlədən cənub istiqamətində, eləcə də Ermənistanın cənubundakı ölkələrə dəmir yolu yüklərinin daşınması probleminin həlli ilə bağlı Azərbaycan Respublikasına yazılı təklif təqdim edib və Azərbaycandan müsbət cavab gözləyir”, - deyə bəyanatda bildirilir.

Ermənistan Baş nazirinin ofisi bəyan edib ki, sülh müqaviləsinin mətni üzrə razılaşma danışıqların yekunlaşdırılması həlledici addımdır. Ermənistan Respublikası Azərbaycan Respublikasını sazişin imzalanma yeri və vaxtı ilə bağlı məsləhətləşmələrə başlamağa çağırıb.

"Biz vurğulamağı zəruri hesab edirik ki, Saziş layihəsinin razılaşdırılmış mətni Ermənistan və Azərbaycan arasında sülhün və münasibətlərin bərqərar olmasının fundamental məsələlərini əhatə edir və gələcək addımların müzakirəsi üçün mexanizmləri nəzərdə tutur", - bəyanatda deyilir.

Rəsmi İrəvan Ermənistan Respublikası ilə Azərbaycan Respublikası arasında dövlət sərhədinin demarkasiyası üzrə işləri davam etdirməyə hazır olduğunu da bəyanata əlavə edib.