Qərbi Azərbaycana Qayıdış Konsepsiyası Qərbi Azərbaycan İcmasının fəaliyyətinin çərçivə sənədidir və bu sənəddə bizim qayıdış uğrunda mübarizəmizin və qayıdışımızın bütün detalları öz əksini tapıb.
Bunu Modern.az-a açıqlamasında Milli Məclisin deputatı, Qərbi Azərbaycan İcmasının sədri Əziz Ələkbərli bildirib.
Deputat vurğulayıb ki, İcmanın Nizamnaməsində xarici ölkələrdə nümayəndəliklərin yaradılması məsələsi öz əksini tapıb:
"Təbii ki, beynəlxalq əlaqələrin qurulması da bizim üçün son dərəcə vacibdir. Əvvəla ona görə ki, bizim qayıdışımız ilk növbədə beynəlxalq hüquqa əsaslanır, problemi beynəlxalq hüququn predmetinə çevirmək üçün isə əlimizdə kifayət qədər hüquqi əsas olmalıdır, bu əsas isə, hər şeydən əvvəl, Qərbi Azərbaycan həqiqətləridir. Deməli, Qərbi Azərbaycan həqiqətlərinin beynəlxalq müstəviyə daşınması bizim üçün prioritet məsələdir. Bu isə aydındır ki, beynəlxalq əlaqələrin qurulmasını tələb edir. Elə Qərbi Azərbaycan İcmasının Nizamnaməsində də xarici ölkələrdə nümayəndəliklərimizin yaradılması məsələsi özünə yer alıb. Başqa istiqamətlərdə olduğu kimi, bu istiqamətdə də İcmamız ilk gündən fəaliyyət göstərir".
İcma sədri qeyd edib ki, artıq bir sıra ölkələrdə nümayəndəliklərimiz və ofislərimiz açılıb.
"İldə bir dəfə Azərbaycanda keçirilən beynəlxalq konfransda xaricdən çoxlu sayda mütəxəssislər, hüquqşünaslar, ekspertlər, siyasət adamları iştirak və çıxış edir. Hər il müxtəlif xarici ölkələrdə neçə-neçə konfrans və sərgilər keçirilir. Tədbirlərimizə xarici ölkələrin Azərbaycandakı diplomatik korpusu dəvət olunur. Elə təkcə bu il İcmamızın xətti ilə üç böyük beynəlxalq tədbirin keçirilməsi nəzərdə tutulub və hazırlıq işləri gedir. Yeri gəlmişkən, son iki ildə İcmamızın doqquz sənədi BMT-nin rəsmi sənədi kimi yayılıb. Nəzərə alsaq ki, İcmamız hələ fəaliyyətinin ilkin mərhələsindədir, demək, görüləcək işlər hələ çoxdur və qarşı tərəf yeni-yeni sürprizlərə hazır olmalıdır".
Əziz Ələkbərli bildirib ki, Qərbi Azərbaycan İcmasının artıq Fransa və Niderlandda nümayəndəlikləri fəaliyyət göstərir.
Xatırladaq ki, ötən il Qərbi Azərbaycan İcması Türkiyədə ofis açıb.
