12 dekabr tarixi Azərbaycanın görkəmli dövlət xadimi, mərhum eks-prezident Heydər Əliyevin anım günüdür.
Modern.az saytının “Bir şəklin tarixçəsi” rubrikasında təqdim etdiyi bu fotoşəkil Heydər Əliyevin anım gününə həsr olunub.
Zaman 1994-cü ilin iyul ayı... Məkan Səudiyyə Ərəbistanının Məkkə şəhəri...
Azərbaycan Respublikasının o vaxtkı prezidenti Heydər Əliyev Səudiyyə Ərəbistanına rəsmi səfər edib. Dövlət başçısını böyük nümayəndə heyəti müşayiət edir.
Səfər çərçivəsində Heydər Əliyev Səudiyyə Ərəbistanının Kralı Fəhd bin Əbüləziz Al Səudla görüşüb, danışıqlar aparıb. Rəsmi görüşlərdən sonra dövlət başçısı və onu müşayiət edən nümayəndə heyəti müqəddəs Kəbəni də ziyarət edib.
Bu, Azərbaycanın hakimiyyət nümayəndələrinin ilk Ümrə ziyarəti idi.
Bu şəklin tarixçəsi barədə həmin səfərdə Heydər Əliyevi müşayiət etmiş mərhum deputat Hadi Rəcəbli xatirələrində yazıb:
“Ümummilli lider Heydər Əliyev 1993-cü ildə hakimiyyətə gələndən sonra qaçqın və məcburi köçkünlərin işlərini, problemlərini mənimlə məsləhətləşirdi. O zaman mən Nazirlər Kabinetində çalışırdım. Ərəb ölkələrindən qaçqın-köçkünlərə hümanitar yardım gətizdirirdik. O dövrlər bizim hökumətin ən çətin zamanları idi. Bakıya hümanitar yardım gətirən ciddəli Əbdülhəmid Dağistani mənə dedi ki, Heydər Əliyevi Həcc ziyarətinə dəvət etmək istəyir, amma çəkinir. Fikirləşirdi ki, birdən razılaşmaz. Dedim ki, Heydər Əliyev Allah adamıdır, heç bir problem yoxdur.
Əslində biz Həcc ziyarətinə getməli idik, ancaq Heydər Əliyevin vaxtı az olduğu üçün Kəbəyə Ümrə ziyarəti etdik. Onda Ulu öndər hakimiyyətə gələndə ona kömək etmiş, yanında olmuş şəxsləri də özü ilə Səudiyyə Ərəbistanına apardı. Dedi ki, gördünüzmü, mən sizə söz vermişdim, indi də sizi ziyarətə aparıram.
Heydər Əliyev Kəbə evinin içində namazın bütün elementlərini yerinə yetirdi. Allaha dua etdi ki, Qarabağ tezliklə işğaldan azad olunsun”.
Şəkildəkilər (soldan sağa):
Hadi Rəcəbli - Nazirlər Kabinetinin şöbə müdiri;
Eldar Namazov - Prezident katibliyinin rəhbəri, Prezidentin köməkçisi;
Həsən Həsənov – Xarici işlər naziri;
Murtuz Ələsgərov – Bakı Dövlət Universitetinin rektoru;
-
Səudiyyə Kralı Fəhd bin Əbüləziz Al Səud;
Bəylər Eyyubov – Prezidentin mühafizə xidmətinin rəhbəri;
Vahid Əzizov – Prezident Aparatı Mətbuat xidmətinin əməkdaşı;
Vaqif Axundov - Ali Dövlət Hakimiyyət və İdarəetmə Orqanlarını Baş Mühafizə İdarəsinin rəisi;
İlham Əliyev - Azərbaycan Respublikası Dövlət Neft Şirkətinin xarici iqtisadi əlaqələr üzrə vitse-prezidenti;
Nemət Pənahlı - Azərbaycan Respublikası Prezidentinin Aparatında dövlət müşavirinin köməkçisi;
Allahşükür Paşazadə - Qafqaz Müsəlmanları İdarəsinin sədri.
A.Qorxmaz
