Salatın Əsgərova Azərbaycanın müstəqilliyi və azadlığı uğrunda mübarizə aparmış xanım qəhrəmanlardan biridir. Onun adı, xüsusilə müharibə dövründəki cəsur davranışları vətənə olan sevgisi və bağlılığı ilə tarixə düşüb. Salatın Əsgərova həm də azərbaycanlı qadının gücünü və qəhrəmanlığını təcəssüm etdirən bir simadır.

Modern.az-ın məlumatına görə, bu gün Azərbaycanın Milli Qəhrəmanı, şəhid jurnalist Salatın Əsgərovanın anım günüdür.

Salatın Əsgərova 1991-ci ildə Azərbaycan Respublikasının müstəqilliyini elan etməsi ilə başlayan həlledici dövrün ən çətin anlarında, düşmənə qarşı mübarizədə cəsarət göstərdi. 1992-ci ildə Qarabağ müharibəsi başlayanda o da ön cəbhəyə gedərək mücacilə etdi. Salatının göstərdiyi əzm və iradə həm də Azərbaycan qadınının qəhrəmanlıq xüsusiyyətlərini ortaya qoydu. Salatın həm də sübut etdi ki, müharibə yalnız kişilərin deyil, qadınların da mübarizəsi, vətənə olan sevgisinin və bağlılığının təzahürüdür.

O, bir qəhrəman kimi daim gənclərə örnək olacaq. Onu xatırlayarkən, müstəqil Azərbaycan xalqının qəhrəmanlıqlarını da yad etmiş oluruq.

Salatın Əsgərova Azərbaycan jurnalistikasının müasir tarixində müstəsna yerə malik olan cəsur və peşəkar qələm sahibi idi. O, yalnız öz dövründəki hadisələri işıqlandırmaqla kifayətlənməyib, həm də xalqının və vətəninin həqiqətlərini dünyaya çatdırmaqda göstərdiyi əzm və cəsarət ilə tanınıb. Onun jurnalistikaya verdiyi töhfələr cəsurluğu və prinsipiallığı ilə yadda qalıb.

Salatın Əsgərova Azərbaycan jurnalistikasının böhranlı dövrlərində, xüsusilə müharibə illərində cəsarətli və vicdanlı yanaşmaları ilə diqqət çəkib. O, təhlükəli şəraitdə işini davam etdirib və həqiqətin üzə çıxarılması üçün hər hansı bir riskdən çəkinməyib.


Salatın Əsgərova müharibənin real təsirlərini qələmi ilə işıqlandırmağa çalışıb. O, yalnız döyüş meydanını deyil, həm də müharibənin sivil həyat üzərindəki mənfi təsirini, humanitar böhranı və məcburi köçkünlərin həyatı kimi məsələləri öz yazılarında təsvir edib.

Onun jurnalistika sahəsindəki fəaliyyəti, cəsarəti və prinsipiallığı gələcək qələm sahiblərinə nümunə olaraq qalacaqdır.

Salatın Əziz qızı Əsgərova 1961-ci ildə dekabrın 16-da Bakıda ziyalı ailəsində anadan olub. 1979-cu ildə orta məktəbi bitirib. Həmin il Azərbaycan Neft və Kimya İnstitutuna daxil olub. 1984-cü ildə geofizika ixtisası üzrə mühəndis diplomu alan Salatın Əsgərova jurnalistika sahəsinə böyük maraq göstərib. Nəticədə müqavilə ilə “Bakı” qəzetində işləməyə başlayıb. 4 il sonra isə o, “Molodyoj Azerbaydjana” qəzetinə keçib. Salatın Əsgərova jurnalist kimi Azərbaycan torpaqlarının bütövlüyü ilə bağlı məslələrə toxunurdu. O, tez-tez cəbhə xəttinə gedir, qaynar nöqtələrdən operativ materiallar hazırlayırdı. Ailəsi Salatının döyüş bölgəsinə getməsindən narahat olsa da, ona mane ola bilmirdi. Hazırladığı reportajlarla müharibənin ən qızğın anlarından xəbər verən Salatın qısa müddət ərzində geniş oxucu auditoriyası qazanmağı bacarmışdı.

1991-ci il yanvarın 9-da Laçından Şuşaya gedərkən yolun 6-cı kilometrliyindəki Qaladərəsi kəndi yaxınlığında onun olduğu maşın erməni terrorçuları tərəfindən pusquya salınır. Yaxın məsafədən şiddətli atəşə tutulan maşındakılar elə oradaca qətlə yetirilib. 

Onu Qaladərəsi kəndində məskunlaşmış 6 nəfərlik erməni bandası qətlə yetirmişdi. Dəstənin başçısı isə Qaladərəsi kəndində fizika-riyaziyyat müəllimi işləmiş Arno Mkrtıçyan idi.

Pusquya salınan Gəncə şəhərinin “N” saylı hərbi hissəsinə məxsus "UAZ 469" markalı 30-14 NB dövlət nömrə nişanlı avtomaşın idi. Atışmanın əvvəlində ermənilər üç hərbçini öldürmüşdülər. Salatın pusquya salınan maşında ağır güllə yarası alsa da, hələ ölməmişdi. Erməni terrorçular maşının qapısını açıb yaralı Salatın Əsgərovanı dayanmadan güllələmişdilər... 

Salatın Əsgərova Bakıdakı Şəhidlər Xiyabanında dəfn olunub.


O, ölümündən sonra - 6 noyabr 1992-ci ildə Azərbaycan Prezidentinin fərmanı ilə “Milli Qəhrəman” adına layiq görülüb.

Hazırda Bakı şəhərində adına bir küçə var. Yaşadığı binaya barelyefi vurulub. Ona Beynəlxalq Jurnalistlər İttifaqı Konfederasiyasının laureatı adı da verilib.

Bir oğlu yadigar qalıb.

Ailə üzvləri Salatının şərəfinə onun adını qardaşı qızına veriblər.

“Anam şəhid olanda mənim 6 yaşım vardı. Mən anamı ədalətli qadın kimi xatırlayıram. Onun üçün ədalət hər şeydən öndə idi. Belə deyim ki, övladına olan sevgisindən də öndə idi. Bir səhv hərəkət edəndə, məni çox sərt cəzalandırırdı. Anam üçün düzgünlük hər şeydən üstün idi. O vaxtalr ölkədə baş verənlərə heç çür normal yanaşa bilmirdi, buna görə də mətbuata üz tutdu. Əslində, o, Azərbaycan Neft və Kimya İnistutunun Geofizika fakültəsini bitirmişdi. Lakin səsinin eşidilməsinə nail olmaq üçün mətbuata üz tutdu”, - bunları oğlu Ceyhun Əsgərov Modern.az-a anası ilə bağlı xatirələrindən danışarkən bildirib.


Ceyhun Əsgərov:

“Redaksiyada tapşırıq olmuşdu, amma heç kəs cəbhə bölgəsinə getmək istəməmişdi. Onda anam bu missiyanı öz üzərinə götürüb “mən məmuniyyətlə gedərəm” demişdi. Çünki anam əslən Qarabağdan - Şuşadan idi. Atasının babası sonralar Şuşadan Füzuliyə köçmüşdü...

...Salatın xanımın adını əbədiləşdirmək üçün, Əmək və Əhalinin Sosial Müdafiə Nazirliyinin yerləşdiyi küçəyə onun adı verilib. Bir vaxtlar Bakı buxtasında katerlərdən biri də anamın adına idi. Amma sonradan kater yararsız olduğu üçün onu dəyişdilər. Təəssüf ki, yeni gətirilən katerə anamın adı verilmədi...

...Böyük məmuniyyətlə istəyərdim ki, anamın adına bir fond yaradım. Bu fondu, Jurnalistika fakültəsində oxuyan tələbələrə və ya hansısa şəhid ailəsinə dəstək olmaq üçün yaratmaq istəyərdim...

...İstəyərdim ki, anamın rəhmətə getdiyi yerin yanında heykəlini qoydura bilim...

...Anamın ən böyük arzusu müharibənin olmaması idi...”.


Ə.Qafarlı