Elə filmlər var ki, izləndikdən sonra uzun müddət yaddaşlardan silinmir. Bu filmləri xatirələrdə yaşadan təbii ki, cəlbedici süjet xətti və aktyor oyunudur.
Tariximizin mühüm dövründən bəhs edən "Babək" filmi də belə ekran əsərlərindəndir. Bu film Azərbaycan xalqının işğala qarşı mübarizliyini nümayiş etdirir. Filmin ideoloji tərəfi azadlıq və ədalət uğrunda mübarizənin simvolu olan xalq qəhrəmanı Babəkin simasında özünü göstərir. Babək bir lider və qəhrəman olaraq, xalqının azadlığı uğrunda mübarizə aparmaqla həm öz dövrü, həm də gələcək nəsillər üçün örnək qoyur.
Babəkin həyatının ekranlaşdırılması yalnız tarixi hadisələrin təqdimatı deyil, eyni zamanda azadlıq və ədalət uğrunda mübarizənin təbliğidir. Film həm Azərbaycan mədəniyyətini tanıtmaq, həm də insan haqları, azadlıq və bərabərlik kimi dəyərləri təbliğ etmək baxımından mühüm əhəmiyyət daşıyır.
Modern.az saytı tamaşaçıların maraqla izlədiyi və yaddaşlarda iz salan filmlərlə bağlı rubrikanı davam etdirir.
“Məşhur filmin unudulmaz qəhrəmanı” adlı rubrikamızda maraqlı filmlərdən yadda qalmış qəhrəmanların kim olduğu barədə qısa məlumat verir, onların keçmiş və indiki görüntüsünü şəkillərlə təqdim edirik.
Babək tammetrajlı bədii filmi məşhur rejissor Eldar Quliyev tərəfindən 1979-cu ildə ekranlaşdırılıb. Film "Mosfilm" və "Azərbaycanfilm" kinostudiyalarının birgə məhsuludur. Bu ekran əsəri o dövrdə Azərbaycan SSR-in ən bahalı filmi kimi mədəniyyət tarixinə düşüb. Onun çəkilişinə ümumilikdə 1 milyon 650 min rubl xərcləndiyi barədə məlumat verilir.
Filmdə əsas rolları Rasim Balayev, Həsənağa Turabov, Amaliya Pənahova, Tamara Yandiyeva, Şahmar Ələkbərov, Məhəmməd Verdiyev, Hamid Azayev və Ənvər Həsənov ifa edirlər.
Onu “Babək” filmində baş qəhrəmanın oğlu Buğday rolunda görüb tanımışıq. Ekran əsərində azadlıq haqqında deyilən və sonradan dillər əzbəri olan o məşhur ifadəni məhz Babəklə oğlu Buğdayın dialoqunda eşidirik. Babək Ərəb xilafətinin sərkərdəsi Afşin tərəfindən əsir alınıb. Afşin ata ilə oğulun görüşünü təşkil edir. Babəkin görüşünə gələn Buğday günahkar bağışlarla əsir alınmış atasına baxır. Babək oğlunu məzəmmət edir və ona:
“Bu dünyada bircə gün azad yaşamaq 40 il boyunduruq altında sürünməkdən daha üstündür”, - deyir.
Ata-oğulun görüşü filmin ən təsirli səhnələrindən biridir. Bu təsirli səhnəni canlandıran iki aktyordan biri – Babəkin oğlu Buğday bu gün 66 yaşını tamam edir.
Söhbət aktyor Məhəmməd Verdiyevdən gedir. 30 yanvar tarixi onun ad günüdür.
Məhəmməd Verdiyev 1959-cu ildə Kəlbəcərdə anadan olub. Üç yaşında ikən ailəsilə Laçına, oradan Yardımlıya köçüb. Buna görə də orta təhsilini 8-ci sinfə qədər Yardımlıda alıb. Partiya işçisi olan atasının fəaliyyətilə əlaqədar daha sonra Şamaxıya köçüblər və o, orta məktəbi orada bitirib.
Orta təhsilini başa vurandan sonra o vaxtkı Xalq Təsərrüfatı İnsitutunda (indiki İqtisad Universiteti) oxumağa başlayıb. Amma sonra buradakı ali təhsilini yarımçıq qoyub, valideynlərinin etirazına baxmayaraq İnsəcənət İnstitutuna daxil olub. 1976-1980-ci illərdə həmin institutda təhsil alıb. Firəngiz Mütəllimova, Zemfira Nərimanova, İlham Əsgərov, Bəsti Cəfərova kimi məşhur sənətkarlarla bir qrupda oxuyub.
O, “Babək” filminin çəkilşlərinə seçilərkən hələ tələbəydi - II kursda oxuyardu. Çəkilişlər başlayan zaman 19 yaşlı Məhəmməd Verdiyev artıq III kursı keçmişdi.
“Babək” filmində Buğday obrazına çəkilmək onun aktyor həyatında, yaradıcılığında böyük rol oynayıb. Məhəmməd Verdiyev məhz bu rola görə tanınıb, məşhurlaşıb.
Buğday obrazı üçün çəkilişə dəfətv olunan 26 namizədin arasından 2 nəfəri seçiblər: “Məhəmməd Verdiyevlə mərhum İlham Əsgərovu. Amma sonda filmin yaradıcı heyəti məhz onun üzərində dayanıb.
Beləcə, tələbə-aktyor Məhəmməd Verdiyev Buğday rolunda oynamaqla bütün keçmiş SSRİ məkanında tanınıb.
Filmdəki Buğday obrazı atasının yolunu izləyərək, bir tərəfdən Babəkin mübarizəsinin məntiqini və məqsədini qəbul edir, digər tərəfdən isə o dövrün ağır reallıqları ilə qarşılaşır. Və sonda özünə qəsd etməklə onu qorxaqlıqda suçlayan atası Babəkin mübarizəsinin davam etdirilməsini simvollaşdırır.
Məhəmməd Verdiyev İncəsənət İnstitutunu bitirdikdən sonbra bir müddət həmin ali məktəbdə dərs deyib və Tədris Teatrında çalışıb.
Yaddaşımızda Buğday kimi qalan aktyor sonralar bir neçə filmə də (“Təxribat”, 1990; “Həm ziyarət, həm ticarət”, 1995) çəkilib.
1997-ci ildə ailəsilə (həyat yoldaşı və iki övladı) Rusiyaya köçüb və təxminən 20 il Tver vilayətində yaşayıb. Orada bizneslə məşğul olub, üstəlik, seriallara da çəkilib (“Yasmin”, 2013; “Ştamp”, 2016).
2016-cı ildə M.Verdiyev daimi yaşamaq üçün vətənə dönüb.
Azərbaycana qayıdandan sonra aktyor iş üçün teatrlara müraciət etsə də, yaşlandığına görə qəbul olunmayıb və xeyli müddət işsiz qalıb.
Daha sonra Azərbaycanda çəkilən “Yuxu kimi”, “Bir qadın” seriallarına dəvət alıb.
Aktyor hazırda Teatr Xadimləri İttifaqında işləyir və özünün mətbuata verdiyi açıqlamalarına görə, maddi durumu – dolanışığı çətindir. O, hətta vaxtilə incəsənət sahəsinə gəldiyinə görə peşmanlıq çəkdiyini də gizlətməyib.
Bu gün 66 yaşını qeyd edən Məhəmməd Verdiyevin iki qızı var və hər ikisi evlidir.
Ə.Qafarlı
