"Konstitusiya və Suverenlik İli” ilə əlaqədar Bakıda metro stansiyalarına yeni adlar veriləcək.
Bu, Prezident İlham Əliyevin Sərəncamı ilə təsdiqlənən 2025-ci ilin "Tədbirlər Planı"nda əksini tapıb.
Qeyd edək ki, Bakı metropoliteninin stansiyaları ilə bağlı ad dəyişikliyi əvvəllər də olub. Bəs indiyə kimi adları dəyişən stansiyalar hansılardı?
Modern.az-ın məlumatına görə, indiyə kimi Bakı metropoliteninin 8 stansiyasının adı dəyişdirilib.
Adı dəyişən metrostansiyalardan biri “İçərişəhər”dir. 6 noyabr 1967-ci ildə istismara verilən bu stansiya “Qırmız xətt”in sonuncu stansiyasıdır. Onun əvvəlki adı “Bakı Soveti” olub. 2008-ci ildə stansiya “İçərişəhər” adlandırilıb. Bu zaman stansiyanın şəhərin tarixi mərkəzi olan İçərişəhərin qala divarının yanında yerləşməsi nəzərə alınaraq, ona belə ad verilib.
“Sahil” stansiyası da ad dəyişikliyinə məruz qalan metrostansiyadır. 6 noyabr 1967-ci ildə istismara verilən bu stansiyanın əvvəlki adı "26 Bakı komissarı" idi. 9 aprel 1992-ci ildə stansiyanın adı dəyişdirilib və “Sahil” adlandırılıb. Əsaslı təmir və yenidənqurmadan sonra stansiya 2018-ci il iyun ayının 7-də yenidən açılıb.
"Xətai" stansiyasının keçmiş adı “Şaumyan” olub. Erməni milliyyətindən olan Stepan Şaumyan XX əsrin əvvəlində Qafqazda fəaliyyət göstərmiş kommunist inqilabçı idi. 26 Bakı komissarına rəhbərlik edən Şumyan azərbaycanlıların məruz qaldığı 1918-ci ildə törədilən Mart soyqırımının əsas təşkilatçılarından biri olub. 1968-ci il 22 fevral tarixində açılan “Şaumyan” metrostansiyasının adı 1991-ci ildə dəyişdirilib. O zaman stansiyaya “Xətai” adının verilməsi Azərbaycanın müstəqillik qazandığı dönəmə təsadüf edib və bu, ölkədəki siyasi dəyişikliklərə uyğun olaraq baş verib.
Adları dəyişdirilən metrostansiyalardan biri də "20 Yanvar" stansiyasıdır. 1985-ci ildən fəaliyyətə başlayan bu stansiyanın ilk adı "XI Qızıl Ordu Meydanı" olub. 1990-cı ildə baş verən məlum 20 yanvar hadisələri zamanı da stansiya "XI Qızıl Ordu Meydanı" kimi fəaliyyət göstərib. Hadisədən 2 il sonra, 27 aprel 1992-ci ildə stansiyanın adı "20 Yanvar"la əvəzlənib.
İndiki "28 May" stansiyasının ilk adı "28 Aprel" olub. Stansiya 6 noyabr 1967-ci ildə istismara verilib. "28 Aprel" adı Azərbaycanda Sovet hakimiyyətinin qurulması şərəfinə verilmişdi. Bakı Metropoliteninin mərkəzi stansiyasının adı 9 aprel 1992-ci ildə dəyişdirilərək "28 May" edilib.
Bakı metropoliteninin 1972-ci ildən fəaliyyətə başlayan bu stansiyası 1991-çi ilə qədər "Avrora" adlanırdı. Stansiya bolşeviklərin 1917-ci ildə baş vermiş Oktyabr inqilabının rəmzinə çevrilən “Avrora” gəmisinin şərəfinə belə adlandırılmışdı. Nəhayət 27 aprel 1992-ci ildən stansiya "Qara Qarayev" adlandırılıb.
Hazırkı "Bakmil" stansiyasının adı əvvələr "Elektrozavod" olub. 1979-cu ildə fəaliyyətə başlayan bu metrostansiya ilk yerüstü stansiyadır. Stansiya Bakı metropoliteninin elektrik deposuna hərəkət edən qatarlarının yolunda yerləşir. 1 yanvar 1993-cü ildən metrostansiyaya "Bakmil" adı verilib. “Bakmil”in açıqlaması “Bakı-Milan” deməkdir. Stansiya müstəqilliyin ilk illərində yaxınlıqda açılmış Azərbaycan-İtaliya birgə müəssisəsinin şərəfinə “Bakmil” adlandırılıb.
Adı dəyişdirilən hələlik sonuncu stansiya "Koroğlu"dur. 1972-ci ildə fəaliyyətə başlayan stansiyanın köhnə adı "Məşədi Əzizbəyov" olub. Məşədi Əzizbəyov XX əsrin əvvəlində fəaliyyət göstərmiş kommunist inqilabçı, 26 Bakı komissrından biri idi.
30 dekabr 2011-ci il tarixində stansiyanın adı dəyişdirilib və Azərbaycanın xalq qəhrəmanı olan Koroğlunun şərəfinə adlandırılıb.
Ə.Qafarlı
