O, qədri bilinməyən, potensialından tam istifadə edilməyən istedadlı aktyorlardan biri idi. Yazılı mənbələrdə haqqında məlumat çox azdır.

Aktyor Nadir Əsgərov... Bəlkə də bu ad-soyad çoxlarına heç nə demir... Amma rollarına tamaşa edəndə, söhbətin hansı aktyordan getdiyi dərhal anlaşılır. Onun bəzi filmlərdə canlandırdığı epizodik rolları yaşlı tamaşaçılar yəqin ki, unutmayıb.

Modern.az saytının “Yaddan çıxmış sənətkarlar” layihəsi bu dəfə aktyor Nadir Əsgərovu sizə xatırladır.

Əslən Xaçmaz rayonunun Qaraçı kəndinən olan Nadir Əsgərov 1936-cı ildə dünyaya gəlib. O, 60 illik ömrünün 40 ilini kino sənətinə həsr edib. Amma bir çox həmkarları ilə müqayisədə əziyyəti layiqincə qiymətləndirilməyib. Heç bir fəxri ada layiq görülməyib…

Nadir Əsgərov epizodik rollar ifa etsə də, özünəməxsus oyun tərzi ilə seçilirdi. Aktyor səhnədəki özünəxas hərəkətləri, səsi, mimikası və bədən dili ilə özünü auditoriyaya qəbul etdirə bilmişdi.

Nadir Əsgərov bir sıra filmlərdə çıxış edib. Nədənsə rejissorlar ona epizodik rolları həvalə ediblər.

“Uşaqlığın son gecəsi”ndə məhəllə sakini, “Yeddi oğil istərəm”də Keçəl, “Var olun, qızlar”da qarpızsatan, “Xatirələr sahili”ndə aşpaz, “Rəqiblər”də pivə içən Nadir, “Alma almaya bənzər”də Mürvət, “Şir evdən getdi”də yanğınsöndürən, “Evlənmək istəyirəm”də balabançalan, “Dəvətnamə”də çayçı və s...

Nadir Əsgərovu yaddaşlara həkk edən obrazlarından biri də"Nuruşbala" olub. Çoxları elə onu Nuruşbala kimi tanıyır, nəinki öz adı ilə... Bu obraz onun ən tanınan və sevilən rollarından biri idi. Nadir Əsgərov bu rolu elə ustalıqla ifa edib ki, Nuruşbala obrazı uzun illər boyunca tamaşaçıların yaddaşında qalıb.

Sənət yoldaşları onu “epizodik rolların mahir ifaçısı” adlandırırdılar.

Nadir Əsgərovun nəslini iki övladı davam etdirir.

Oğlu Mübariz Əsgərov:

“Düzdür, atama fəxri ad verilmədi, ancaq o, ən gözəl qiyməti tamaşaçılardan aldı. Bu gün atamı xatırlayan insanların onun haqqında dediyi gözəl sözləri eşitmək məni bir övlad kimi kövrəldir”.
 
Nadir Əsgərov 60 il yaşadı. 1996-cı ilin bu ayında - 23 apreldə həyatla əbədi vidalaşdı.

Qızı Mahirə Əsgərova:

“Canım atam çox sevdiyi bir bahar səhərində bizi yalnız qoyub bu dünyadan köçdü. Onun yoxluğunu necə anladım, heç bilmirəm. O gözəl gülən və güldürən çöhrəsi bir an belə yadımdan çıxa bilməz. Tək təsəllim atamın incəsənətimizə və xalqımıza verdiyi töhfələr, filmlərdəki yaddaqalan, daim sevilən obrazları və sənətdə sevilən tələbələridir”.

Qeyd edək ki, aktyor Nadir Əsgərov həm də pedaqoji fəaliyyətlə məşğul olub, Mədəni Maarif Texnikumunda dərs deyib.

Ə.Qafarlı