Dünya siyasətində bir sıra nüfuzlu liderlər var ki, subay qalmağı üstün tutaraq həyatları boyu evlənməyiblər. Subay həyat sürən bu siyasilər karyeralarında böyük uğurlara imza atmaqla milyonlarla insanın diqqətini cəlb edə biliblər. Onlar şəxsi həyatları barədə danışmağı xoşlamırlar. Şəxsi həyatlarının sirli qalması bəzən bu siyasətçiləri daha cazibədar və maraqlı edir.
Hazırda Türkiyənin əsas siyasi partiyalarından biri olan Milliyətçi Hərəkat Partiyasının (MHP) sədri Devlet Bahçeli subay siyasətçilər sırasında yer alır.
1948-ci il təvəllüdlü Devlet Bahçelinin özündən başqa iki qardaşı və bir bacısı da var.
O, 7 iyul 1997-ci ildən Milliyətçi Hərəkat Partiyasının sədridir. 2000, 2003, 2006, 2009, 2012, 2015, 2018 və 2021-ci illərdə baş tutan MHP qurultaylarında sədr seçilib.
Bahçeli MHP sədri olaraq Türkiyə Böyük Millət Məclisinin deputatıdır.
Devlet Bahçeli şəxsi həyatı ilə bağlı qısa açıqlamalarında ömrünü partiyaya-siyasətə həsr etdiyini, şəxsi həyatına vaxt ayırmadığını deyib.
Amma Devlet bəy haqqında başqa bir hekayə də var. Deyilənlərə görə, onun evlənməməsinə səbəb zamanında birini çox sevməsi olub.
Belə ki, 1960-cı illərdə Devlet Bahçeli indiki adı Qazi Universiteti olan Ankara İqtisadi və Ticarət Elmlər Akademiyasında təhsil alanda solçu bir xanıma aşiq olub. Qarşılıqlı sevgiyə qızın atası qarşı çıxıb "mənim ülküçüyə veriləcək bir qızım yoxdur” deyib. Qız Bahçeliyə qaçmagı təklif etsə də o, "atanın xeyir-duasını almadan olmaz” söyləyibr. Sonuc olaraq evlənə bilməyən aşiqlər bir-birlərinə ömürlərinin sonuna qədər ailə qurmayacaqlarına dair söz veriblər.
Bahçelinin özü bu haqda heç vaxt danışmayıb. O bildirib ki, evlənməməsi qismət məsələsidir və peşman deyil.
Devlet Bahçeli digər açıqlamasında ailənin onun siyasi fəaliyyətinə mane ola biləcəyinə inandığı üçün heç vaxt evlənmədiyini bildirib.
77 yaşlı Devlet Bahçeli hazırda bacısı ilə Ankarada yaşayır.
***
Hindistanın hazırkı baş naziri Norendra Modi də subay siyasətçi olaraq tanınır. O, radikal-millətçi baxışlara çox erkən yaşlardan yiyələnib. 17 yaşında evdən çıxaraq dərviş kimi Hindistanı sərasər dolaşıb və səyahətdən geri dönən kimi doğma Qucarat ştatının paytaxtı Əhmədabadda hind millətçi təşkilatının üzvü olub.
Narendra Modi dəfələrlə anti-müsəlman bəyanatları səsləndirməklə gündəmə gəlib. İddialara görə, Modi 2002-ci ildə doğulduğu Qucaratda baş vermiş qırğında mindən çox müsəlmanın öldürülməsində xüsusi rol oynayıb.
Hindistanın 16-cı baş naziri olan Norendra Modi 2014-cü ildən bu vəzifədə çalışır.
Onun haqqındakı məlumatlara görə, N.Modi çox gənc olanda - 18 yaşında bir qızla evlənib, lakin bu evlilik ailə həyatına çevrilməyib. Modi uzun illərdir subay kimi yaşayır və özünü "xalqın xidmətinə həsr etdiyini" bildirir. Onun həyat tərzi və intizamı Hindistanda çoxlarının maraqla izlədiyi nümunələrdəndir.
N.Modi sosial şəbəkələrdə tərəfdarları ilə fəal ünsiyyət qurur. 2019-cu ilin yanvar ayına olan məlumata görə, onun X (tvitter) səhifəsinin 45 milyon izləyicisi var. Maraqlıdır ki, siyasətçilər arasında yalnız Barak Obama (104,1 milyon) və Donald Trampın (57,2 milyon) daha çox abunəçisi var. Modi tez-tez getdiyi ölkənin dilində tvit yazır.
O, vegetariandır. Qucarat dilində şeir yazır.
***
Amerikanın keçmiş dövlət katibi, hazırda 71 yaşı olan Kondoliza Rays da heç vaxt ailə həyatı qurmayıb.
Diplomat, siyasətşünas Kondoliza Rays 2001-2005-ci ilər arasında ABŞ-nin 20-ci milli təhlükəsizlik müşaviri, 2005-2009-ci illər arasında isə ABŞ dövlət katibi vəzifəsini tutub.
Kondoliza Rays 1954-cü ildə ABŞ-nin Alabama ştatının Birmingem şəhərində anadan olub. 1974-cü ildə Denver Universitetinin Siyasət elmləri fakültəsini, 1975-ci ildə Notrdam Universitetinin magistratura pilləsini bitirib. Rays 1981-ci ildə Denver Universitetində Beynəlxalq münasibətlər üzrə doktorluq işi müdafiə edib.
Corc Buşun prezidentliyinin ilk dövründə milli təhlükəsizlik üzrə müşavir vəzifəsini icra edən Rays, Buşun ikinci idarəçiliyi dövründə dövlət katibi vəzifəsini tutub. Bu müddət ərzində o, universitetin rektor köməkçisi vəzifəsini də icra edib. O, Stenford Universitetinin Hüquq fakültəsində siyasət elmlərindən dərs dediyi zaman iki dəfə "bacarıqlı pedaqoq" diplomu ilə təltif edilib.
Rays Sovet İttifaqı və Şərqi Avropanın xarici işlər və müdafiə siyasətinə dair bir çox məqalələrin müəllifidir.
Kondoliza Rays 2020-ci ildən Huver İnstitutunun direktorudur.
Kondoliza Rays heç vaxt evlənməyib və övladlığa da uşaq götürməyib. İddialara görə, Denver Universitetində oxuyarkən o, amerikalı futbolçu Rik Upçörç ilə yaxın dost olub və yaxın münasibət saxlayıb. Lakin onlar evlənməyiblər.
2006-cı ilin sentyabrında “Nyu-York Tayms” qəzeti Rays ilə Kanadanın o vaxtkı xarici işlər naziri Piter Makkay arasında mümkün yaxın münasibət barədə məlumat vermişdi.
Subay siyasətçi olmaq nə üstünlük, nə də çatışmazlıqdır - bu, şəxsi bir seçimdir. Mühüm olan liderin peşəkarlığı, dürüstlüyü və xalqa xidmətə olan sadiqliyidir. Cəmiyyətin də siyasətçilərə baxış bucağında şəxsi həyatdan daha çox onların fəaliyyətinə fokuslanması demokratik inkişaf üçün vacibdir.
Ə.Qafarlı
