32 ildən sonra Ağdama ilk sərnişin qatarının yola düşməsi ağdamlılar arasında böyük sevincə səbəb olub.
Bu gün Bakıdan yola düşən qatarın sərnişinləri arasında Milli Qəhrəman Allahverdi Bağırovun qızları da yer alıb.
Modern.az onların bu səfərlə bağlı təəssüratlarını öyrənib.
Milli Qəhrəmanın qızı Aynur Bağırova deyib ki, illər sonra baş tutan bu səfər onlara hədsiz sevinc hissi bəxş edib.
“Artıq Ağdama tez-tez gedə bilmək üçün daha yaxşı şərait yaradılıb. Bizim üçün ən vacib məsələ atamın qəbrini ziyarət etməkdir. İndi daha tez-tez ora gedə biləcəyik”.
Zümrüd Bağırova isə bildirib ki, illər əvvəl valideynləri ilə qatarda Ağdama getdiyi günlər indi yenidən təkrarlanır:
“Bütün ağdamlılar kimi, biz də sevinirik, ata-baba yurdumuza qovuşmaq asanlaşır. O vaxt valideynlərimlə qatarda Ağdama gedirdik, tarix 32 ildən sonra yenidən təkrarlanır. Bu əvəzolunmaz hissdir. Atamın məzarını dəfələrlə ziyarət etmişik, amma bu dəfə kollektivlə birlikdə getməyin duyğusu tam başqadır”.
Z.Bağırova bütün şəhidlərin xatirəsini ehtiramla anıb:
“Allah torpaqlarımız uğrunda canından keçən bütün şəhidlərimizə rəhmət eləsin. Biz bu gün onların sayəsində torpaqlarımıza gedir və doğma yurd-yuvamızı ziyarət edirik”.
