“Валентино” мода үйүнүн негиздөөчүсү, италиялык модельер Валентино Гаравани 93 жашында каза болду.
Modern.az чет элдик ЖМКларга таянып билдиргендей, Валентино Гаравани 19-январда Римдеги резиденциясында, жакындарынын курчоосунда каза болду. Аны эскерүү аземи 21 жана 22-январда Пьяцца Миньянелли аянтында өтөт. Сөөк коюу аземи жума күнү Санта-Мария-дельи-Анджели-э-дей-Мартири базиликасында болот.
В. Гаравани 1932-жылы 11-майда Италиянын түндүгүндөгү Вогера шаарында төрөлгөн. 17 жашында Парижге көчүп барып, ал жерде Ecole des Beaux-Arts жана Haute Couture Синдикатында билим алган. 1959-жылы Валентино Гаравани Римге кайтып келип, бир жылдан кийин өнөктөшү Джанкарло Джамметти менен бирге мода үйүн негиздеген.
Эл аралык заказдарга алып келген анын биринчи көргөзмөсү 1962-жылы Флоренцияда өткөн. Анын алгачкы кардарларынын арасында өлтүрүлгөн АКШ президенти Жон Кеннединин жубайы Жаклин Кеннеди да болгон. Ал күйөөсүн эскерүү аземинде кийүү үчүн алты көйнөккө заказ берген.
1998-жылы Валентино Гаравани жана Джанкарло Джамметти “Valentino” брендин италиялык HDP конгломератына 300 миллион долларга сатышкан, ал эми 2002-жылы аны Marzotto Appareli сатып алган. В. Гаравани Париждеги акыркы көрсөтүүсүнөн кийин 2007-жылы модадан кеткенин жарыялаган.
