«Mənə məlum olduğu qədər, Azərbaycan ordusu cənub istiqamətində artıq bir çox strateji yüksəklikləri ələ keçirib və onları əlində saxlayır». Modern.az saytı xəbər verir ki, bunu virtualaz.org-a müsahibəsində ehtiyatda olan general-leytenant, Azərbaycan Silahlı Qüvvələrinin keçmiş korpus komandiri Yaşar Aydəmirov deyib.
«Azərbaycan ordusu doğru qərar qəbul edərək, bir-birinin ardınca strateji yüksəklikləri tutur ki, bu da bizə hərbi əməliyyatların keçirilməsində tam üstünlük verir. Cəbhənin əksər hissələrində ordu bölmələrimiz düşməni əvvəlki mövqelərindən sıxışdırıb çıxarıb və biz irəliləyirik», - hərbçi belə deyib.
Azərbaycanın hərbi əməliyyatların gedişində TOS-1 ağır odsaçanlardan istifadə etməsi xəbərini şərh edən general Y.Aydəmirov bildirib ki, əgər Ermənistan fikrindən vaz keçməsə, hərbçilərimiz tərəfindən daha müasir silah növləri tətbiq ediləcək ki, bunlar düşməni, sözsüz ki, təşvişə salacaq.
Modern.az
