Hüsnü Mübarəkin istefa verməyə tələsməməsinin səbəbləri var
Misir prezidentinin taleyi ilə bağlı İsraillə ABŞ arasında fikir ayrılğı yaranıb. Bu barədə Modern.az-a diplomatik korpusdan adının çəkilməməsini istəyən mənbə bildirib.
Mənbə idia edir ki, İsrail Hüsnü Mübarəki dəstəkləyərək kəskin şəkildə Vaşinqtondan ona toxunmamağı tələb edib. Rəsmi Təl-Əviv hesab edir ki, ərəb dünyasında yeganə yaxşı münasibətdə olduğu Mübarək rejiminin dəyişməsi İsrail üçün gözlənilməz nəticələr verə bilər.
Təl-Əviv ABŞ-dan tələb edir ki, Misirdə baş verən vətəndaş itaətsizliyini aradan qaldırmaq üçün təcili olaraq Hüsnü Mübarəklə danışıqlara başlasın. Hazırda Hüsnü Mübarək bu müzakirələrdən xəbərdardır və ona görə də nəticələr bəlli olana qədər hakimiyyəti buraxmır. İsrail hətta İngiltərəyə bu məsələdə ABŞ-a təzyiq edilməsi üçün mesaj göndərib.
İsrail regionda 1974-cü ildən bəri bərqərar olan status-kvonun dəyişəcəyindən qorxur. Təl-Əviv siyasətçiləri hesab edirlər ki, Misirin yeni koalisiyalı hakimiyyətində olacaq siyasi quvvələr anti-İsrail xəttinə üstünlük verəcəklər. Təl-Əviv ehtiyat edir ki, bu proses sonucda İsraili Fələstin dövlətinin yaradılması üçün yeni danışıqlara məcbur edə bilər.
Müşahidələr göstərir ki, ABŞ isə Misirdə yeni hakimiyyətin yaranması fikrini tam dəstəkləyir və İsrail üçün təhlükəli olmayacağını inandırmağa cəhd edir.
Qeyd edək ki, Misir prezidenti Hüsnü Mübarək dünən televiziya ilə xalqa müraciət edərkən yanvarın 25-dən vüsət alan xalq hərəkatının əsas tələbinə - istefa verməsi tələbinə toxunaraq prezident kürsüsündən getməyəcəyini vurğulayıb.
82 yaşlı H.Mübarək onu da vurğulayıb ki, o, 2011-ci ilin sentyabrında keçiriləcək prezident seçkisinə qatılmayacaq. Əvəzində onun öz yerinə oğlu Qamal Mübarəki hazırladığı bildirilir.
