Fövqəladə Hallar Nazirliyinin Dövlət Sularda Xilasetmə Xidməti əhalini növbəti dəfə çimərliklərdə qaydalara riaətə etməyə çağırıb. Dövlət Sularda Xilasetmənin Təbliğat və təşkilat sektoru bildiri ki, hazırda 42 struktur bölmə - 31 xilasetmə məntəqəsi, 7 xilasetmə postu və 4 dalğıc-axtarış qrupu fəaliyyət göstərir.
“Təcrübə göstərir ki, insanlar əksər hallarda istirahət edərkən ən yaxın su hövzəsinə üz tutur və həmin ərazinin nə qədər təhlükəli olub-olmamasını aydınlaşdırmadan suya girir və istirahət etməyə çalışır. Bəzən də dənizə yaxın restoranda "yeyib-içən" bəzi insanlar dərhal yaxınlıqdakı dənizə girməyə çalışır və bununla da öz həyatını təhlükəyə atmış olurlar. Təsadüfi deyil ki, ötən illərin statistikası da suda boğulma hallarının əksər hissəsinin məhz qeyri-çimərlik ərazilərində baş verdiyini göstərir”-deyə qurumdan bildirilib
Dövlət Sularda Xilasetmə Xidmətinin məlumatına görə, 2010-cu il ərzində respublikanın su hövzələrində ümumilikdə suda boğulma halı ilə üzləşən 688 nəfərin həyatı xilas olunsa da, suda boğulma faktı da qeydə alınıb. Belə ki ötən il sularda boğulmuş 95 nəfərdən 93-ü məhz çimmək üçün qadağan olunan ərazilərin payına düşür.
2011-ci ildə isə xilasetmə avadanlıqları ilə təchiz olunmuş ərazilərdə və digər su hövzələrində xilas edilənlərin sayı bugünkü günədək 132 nəfərə çatıb.
”2011-ci il 12 iyul tarixinədək sularda boğulan 23 nəfərin hamısı qeyri çimərlik ərazilərində, yəni, çimmək üçün qadağan olunan ərazilərdə baş verib. Dövlət Sularda Xilasetmə Xidməti tərəfindən ölkənin su hövzələrində 2006-cı ildə 340 nəfər, 2007-ci ildə 643 nəfər, 2008-ci ildə 369 nəfər, 2009-cu ildə 254 nəfər, 2010-cu il ərzində 688 və 2011-ci ildə (12 iyul tarixinə) 132 nəfər (cəmi 2426 nəfər) batmaq təhlükəsi ilə üzləşmiş vətəndaşlar xilas edilib”.
“Hazırda yay fəsli özünün ən isti üzünü bizlərə göstərməkdədir. Ancaq unutmaq olmaz ki, təbiətin bizə bəxş etdiyi bu isti havanı da səmərəli , xoş və istirahətlə keçirmək mümkündür. Ancaq bu istirahətin bədbəxt hadisə ilə yox, xoş xatirə kimi yadda qalmasını istəyirsinizsə, onda çimərlikdə təhlükəsizlik qaydalarına sözsüz əməl edin”-deyə Dövlət Sularda Xilasetmə Xidməti bəyan edib.
