Nazirlər Kabineti kəşfiyyat və əks-kəşfiyyat sistemində işləyən hərbi qulluqçuların əmək stajı ilə bağlı qərar qəbul edib. Modern.az Nazirlər Kabinetinə istinadən xəbər verir ki, 1992-ci il 23 noyabr tarixli 631 nömrəli qərarın 1-ci hissəsinə aşağıdakı məzmunda on yeddinci abzas əlavə edilib.
Həmin əlavə edilmiş abzasda deyilir ki, "yüksəkixtisaslı mütəxəssislər sırasından seçilərək kəşfiyyat və əks-kəşfiyyat fəaliyyəti subyektlərinə hərbi xidmətə qəbul olunmuş hərbi qulluqçuların hərbi xidmətə qəbul olunana qədərki əmək stajı iki günü bir gün hesablanmaqla uzun müddət xidmətə daxil edilir".
Nazirlər Kabinetinin adıçəkilən qərarı "Zabit heyətinə mənsub şəxslərə, praporşiklərə, miçmanlara, müddətindən artıq xidmətdə qalan hərbi qulluqçulara, daxili işlər, ədliyyə, gömrük, miqrasiya, feldyeger rabitəsi, fövqəladə hallar orqanlarının rəis və sıravi heyətinə mənsub şəxslərə və onların ailələrinə pensiya təyin edilib verilməsi üçün uzun müddət xidmət vaxtının hesablanması qaydası haqqında" adlanır.
Qərarı baş nazir Artur Rəsizadə imzalayıb.
