İraqda səfərdə olan İraq-Azərbaycan Parlamentlərarası Dostluq Qrupunun üzvü, millət vəkili Qənirə Paşayeva İraq Türkmən Cəbhəsinin lideri, millət vəkili Ərşad Salihi ilə görüşüb.
Millət vəkili həmçinin İraq Türkmən Cəbhəsinin yeni istifadəyə verilən binasını da ziyarət edib və təşkilat rəsmiləri ilə görüşüb. Görüşdə Azərbaycandan olan digər deputat Etibar Hüseynov, yazar Şəmsəddin Kuzəçi də iştirak edib. Görüş zamanı İraqdakı vəziyyət, bu ölkədə yaşayan türkmənların vəziyyəti, Azərbaycanla İraq arasında bütün istiqamətlərdə münasibətlərin inkişafı istiqamətində mövcud olan potensial barədə fikir mübadiləsi aparılıb.
Azərbaycanı qardaş ölkə adlandıran Ərşad Salihi parlamentlərarası, hökumətlərarası münasibətlərin inkişafı ilə yanaşı, Azərbaycan türkləri ilə İraq türkləri arasında əməkdaşlığın artmasının vacibliyini də vurgulayıb. Qənirə Paşayeva da Azərbaycanın İraqla əməkdaşlığın inkişafına önəm verdiyini, parlamentlərarası münasibətlərin inkişafında maraqlı olduğunu vurğulayaraq dekabrın ortalarında İraq-Azərbaycan Parlamentlərarası dostluq qrupu üzvlərinin Bakıya səfərinin də bu istiqamətdə münasibətlərə öz müsbət töhfəsini verəcəyini vurğulayıb.
İraq Türkmən Cəbhəsinin sözcüsü, Kərkük İl Məclis üzvü Əli Mehdiyə qarşı sui-qəsd, onun evinin önündə yerləşdirilən bombaların partladılması nəticəsində 1 nəfərin həlak olması, 15 nəfərin yaralanmasından azərbaycanlıların da üzüldüyünü deyən Qənirə Paşayeva ƏIi Mehdinin bu sui-qəsdən salamat qurtula bilməsindən sevindiklərini bildirib.
İraqda yaşayan türkmənlərin son on illər ərsində ədalətsizliklər, ağır problemlərlə üzləşdiyini vurğulayan Qənirə Paşayeva İraqda yaşayan türkmənlərin layiq olduqları haqları əldə edə biləcəklərinə ümid etdiyini bildirib.
Qənirə Paşayeva görüşdə Ermənistanın işğal etdiyi Azərbaycan torpaqlarında törətdiyi vandalizm aktları, minlərlə azərbaycanlını qətlə yetirməsi, Xocalı, Qaradağlı, Bağanıs-Ayrım soyqırımları, BMT Təhlükəsizlik Şurasının 4 qətnaməsinin Ermənistandan işğal etdiyi Azərbaycan torpaqlarından çəkilməsini tələb edən qətnamələrinin yerinə yetirilməməsi barədə məlumat verib.
Qənirə Paşayeva Ərşad Salihiyə Azərbaycan həqiqətlərinə, mədəniyyətinə, tarixinə dair materiallar, kitablar və sənədli filmlər də təqdim edib və onu Azərbaycana dəvət edib.
Azərbaycan torpaqlarının 20 faizinin hələ də Ermənistanın işğalı altında olması, azərbaycanlı qaçqın və məcburu köçkünlərin öz evlərinə dönə bilməməsinin onları da ciddi narahat etdiyini deyən İraq Türkmən Cəbhəsinin lideri, millət vəkili Ərşad Salihi Azərbaycan həqiqətlərinin yayılması istiqamətində öz səylərini bundan sonra daha da artıracaqlarını vurğulayıbdır. O, məmnuniyyətlə Azərbaycana səfər edəcəyini söyləyib. Sonra İraq Türkmən Cəbhəsinin ofisində Türkman Eli televiziyasına geniş müsahibə və açıqlamalar verilib, suallar cavablandırılıb.
Modern.az
