52 saylı Quba seçki dairəsindən seçilən millət vəkili Vahid Əhmədovun seçiciləri ilə növbəti görüşü olub. Bu barədə Modern.az-a Vahid Əhmədovun qərərgahından məlumat verilib. Qərərgahdan bildirilib ki, qəbula gələnlərin ümumi sayı 31 nəfər olub. Qəbul zamanı seçicilər deputata müxtəlif suallarla müraciət ediblər. Ən çox qaldırılan məsələ mənzillə təmin olunma, təhsil haqqlarının ödənilməsində yaranan çətinliklər, kreditlərin alınmasında problemlər, dağ kəndlərinin körpü və yol məsələləri, işlə təmin olunma və s. olub.
Qərərgahdan o da bildirilib ki, əvvəlki qəbullardan fərqli olaraq bu dəfə ən çox qabardılan məsələ sosial yardımların alınmasında yaradılan problemlər olub. Deputatın qərargahından bildirilib ki, bu məsələ ilə bağlı qoyulan sualların heç də hamısı həqiqəti əks etdirmir, bu da müavinətlərin təyin olunması qaydalarının əhali tərəfindən zəif bilməsi ilə izah olunmalıdı. Qəbul zamanı qaldırılan vacib məsələ rayonda yetişdirilən alma məhsulunun böyük hissəsinin əhali tərəfindən bu günə qədər satışa çıxara bilməməsi olub. Camaatın dediyinə görə, buna əsas səbəb meyvənin Rusiya bazarlarına aparılması zamanı hər
iki tərəfdən sərhəddə yaradılan süni əngəlliklərdir ki, bu da tez bir zamanda öz həllini tapmalıdı.
Millət vəkilinin qərərgahından bildiriblər ki, Quba rayonunun Alekseyevka kəndindən gələn dörd nəfər seçici rayonda 1 mart mitinqi zamanı hadisələrin kəskin məcraya yönəlməməsi üçün deputatın gördüyü praktik işlərə görə ona əhali adından öz minnətdarlığını bildiriblər.
V.Əhmədov qəbuldan sonra rayon mədəniyyət evində Novruz bayramı münasibəti ilə təşkil olunan ümümrayon yığıncağında iştirak edərək rayon sakinlərini bayram münasibəti ilə təbrik edib.
Sonda seçicilər üçün bayram konserti təşkil olunub.
Modern.az
