“Gün ərzində Daşınmaz Əmlakın Dövlət Reyestri Xidmətinin 148 nömrəli qaynar xətti”nə 20-yə yaxın zəng daxil olur. Daxil olan müraciətlərin əksəriyyəti daşınmaz əmlakın qeydiyyat məsələləri ilə bağlıdır”. Bu barədə Modern.az-a Əmlak Məsələləri üzrə Dövlət Komitəsinin mətbuat mərkəzinin rəhbəri Qulu Xəlilov məlumat verib.
“Vətəndaşların müraciətlərinin cavablandırılması, bu sahədə operativliyin artırılması ilə bağlı tək komitədə yox, həm reyestr xidmətində, həm də auksion mərkəzində “qaynar xətlər” fəaliyyət göstərir. 24 saat ərzində fəaliyyət gostərən “qaynar xətlər”ə istənilən an vətəndaşlar tərəfindən müraciətlər daxil olur”.
Komitə sözçüsü qeyd edib ki, “qaynar xətt”ə daxil olan məlumatlar müxtəlif səpgidədir. “Bizə edilən müraciətlər daşınmaz əmlakın özəlləşdirilməsi, icarəyə verilməsi, icarə rüsumları, səhmdar cəmiyyətlərin özəlləşdirilmə qaydaları, torpaq sahələrinin özəlləşədirilməsi, eyni zamanda daşınmaz əmlakın qeydiyyat prosedurlarının öyrənilməsi, vətəndaşların bağ sahələri, mənzillərin qeydiyyata alınması, qeyri-yaşayış yerlərinə texniki pasportların tərtib olunması ilə bağlı olur”.
Q.Xəlilov deyib ki, otən il ərzində komitədə fəaliyyət göstərən 193, 148 və 566-07-44 nomrəli “qaynar xətlər”ə 700-ə yaxın müraciət olub.
“Bu müraciətlərin 70-80 faizi vətəndaşların həm qeydiyyat, həm də özəlləşdirmə prosedurlarının öyrənilməsi ilə əlaqəli olur. Təbii ki, şikayət xarakterli müraciətlər də olur, amma araşdırma zamanı vətəndaşların hüquqlarını izah edirik və başa düşülür ki, vətəndaş özü öz hüququnu bilməyərəkdən bizə şikayət xarakterli sorğu göndərib”.
Nihadə Eyyubova
