2011-ci ildə Hesablama Palatası tərəfindən həyata keçirilmiş maliyyə-büdcə nəzarəti tədbirlərinin yekununda 1 milyon 070 min manat məbləğində vəsaitin dövlət büdcəsinə bərpası təmin edilib, o cümlədən artıq ödənilmiş vəsaitlər üzrə 616,9 min manat məbləğində vəsait nağd qaydada aidiyyəti qurumların müvafiq kassa və ya bank yaxud xəzinə hesablarına bərpa edilib, qanunvericiliyin tələbləri pozulmaqla əssasız ödənişlər üzrə 293,4 min manat köçürmə yolu ilə dövlət büdcəsinə ödənilib.
Modern.az-ın məlumatına görə, bu barədə Hesablama Palatasının Milli Məclisə təqdim etdiyi 2011-ci ilin hesabat sənədində bildirlib.
Sənəddə qeyd edilib ki, ötən il keyfiyyətsiz yerinə yetirilmiş və ya süni surətdə dəyəri artırılmış iş və xidmətlərin müqabilində 699,1 min manat məbləğində əlavə işlərin və xidmətlərin görülməsi təmin olunub ki, bu da layihə-smeta sənədlərində nəzərdə tutulmuş təmir-bərpa və yenidənqurma işlərinin tam həcmdə yerinə yetirilməsinə imkan verib.
Hesabat ilində 573 min manat məbləğində çatışmayan müqavilə öhdəliklərinin yerinə yetirilməsi təmin olunmayan inventar və avadanlıqların, dərman vasitələrinin müqqəsir şəxslərin vəsaitləri hesabına alınmaqla büdcə təşkilatlarına təhvil verilib, habelə uçotdan kənarda qalmış 810,3 min manat məbləğində əsas vəsaitlərin və 910,5 min manat məbləğində mal-materialların, iş və xidmətlərin uçota alınması, əssasız olaraq balans dəyəri artırılmış 39,9 min manat məbləğində əsas vəsaitlərin balans dəyərinin azaldılması təmin olunub. Mal, iş və xidmət alışı olmadan qabaqcadan aparılan ödənişlər hesabına yaradılmış 512,9 min manat məbləğində debitor borcun uçota götürülməsi, 1192,5 min manat məbləğində debitor borcun ləğv edilməsi və 11851,1 min manat məbləğində debitor borcun bağlanması audit tədbirləri nəticəsində təmin edilib.
Bunlarla bərabər, hesabat ilində Hesablama Palatasının nəzarət tədbirləri nəticəsində 336,5 ştat vahidi, 147 qrup və ya sinif ləğv edilib, başqa sözlə nəzarət tədbirləri nəticəsində xeyli miqdarda vəsaitin qanunvericiliyin tələblərinə zidd olaraq xərcə yönəldilməsinin qarşısını qabaqcadan almaq mümkün olub.
Bundan başqa, dövlət büdcəsinə böyük məbləğlərdə borcu olan vergi ödəyicilərinin 2 vergi ödəyicisi barədə Vergilər Nazirliyinin Vergi Cinayətlərinin İbtidai Araşdırılması Departamenti tərəfindən cinayət işi başlanılıb, habelə Hesablama Palatası Baş Prokurorluqla birgə sosial müdafiə sahəsində iki yoxlama tədbiri həyata keçirib.
Palata hesabat ilində audit tədbirləri nəticəsində aşkar edilmiş nöqsan və çatışmazlıqlara yol verən dövlət orqanlarının məsul şəxsləri barəsində aidiyyəti orqanlar tərəfindən ciddi intizam tənbehi tədbirlərinin görülməsinə də nail olub. Belə ki, 25 nəfər (2 idarə və ya təşkilatın rəhbəri, 2 şöbə müdiri, 4 baş mühasib, 17 işçi ) işdən azad edilib, 7 nəfərə (2 şöbə müdiri, 2 baş mühasib və 3 işçi) şiddətli töhmət, 43 nəfərə (4 idarə və ya təşkilatın rəhbəri, 4 idarə və ya təşkilat rəhbərinin müavini, 5 şöbə müdiri, 6 sektor müdiri, 16 baş mühasib və 8 işçi) töhmət verilıb, 46 nəfərə (9 idarə və ya təşkilat rəhbəri, 3 idarə və ya təşkilat rəhbərinin müavini, 13 şöbə müdiri, 2 müdir müavini, 4 sektor müdiri, 6 baş mühasib və 9 işçi) xəbərdarlıq edilib, 1 nəfər (sektor müdiri) aşağı vəzifəyə keçirilib.
Modern.az
