Milli Məclisin deputatı Vahid Əhmədov Quba şəhərində yerləşən ofisində seçiciləri ilə görüşərək onları qəbul edib. Deputatın köməkçisi Arif Orucovun Modern.az-a verdiyi məlumata görə, qəbulda 36 rayon sakini iştirak edib. Deputat qəbula gələn digər seçki dairəsinin ərazisində yaşayan sakinləri də qəbul edib. Qəbul zamanı ən çox qaldırılan məsələ mənzil şəraitinin yaxşılaşdırılması və evlə təmin olunma olub.
Hər qəbul zamanı təkrarlanan məsələ-sosial yardımların təyin olunmasında və verilməsində yaranan problemlər və onların məmurlar tərəfindən gec həll olunması olub. Hal-hazırda rayon sakinlərini çox narahat edən məsələlərdən biri də işsizlik və işlə təmin olunmadı. Yaz tarla işlərinin başlanması ilə əlaqədar bir qrup sakin deputatdan bağçılıq və ziyanvericilərlə mübarizə üçün rayona gətiriləcək dərman preparatlarının keyfiyyətinə nəzarətin gücləndirilməsi işinə aidiyyatı qurumların diqqətini çəkməyi xahiş ediblər. Rayon üçün bu vacib məsələ deputat tərəfindən nəzarətə götürülüb.
Qəbuldan sonra millət vəkilinin Quba rayon İcra Hakimiyyətinin başçısı Mübariz Ağayevlə görüşüb və rayonda aparılan abadlıq işləri ilə tanış olub.
Modern.az
