Azərbaycanda fəaliyyət göstərən diplomatik korpusun və bir sıra beynəlxalq təşkilatların təmsilçilərinin aprelin 24-də İctimai Palatanın (İP) rəhbərliyi ilə görüşünə münasibət birmənalı deyil. Diplomatların artıq 4-cü dəfədir müxalifət olaraq məhz İP-də təmsil olunan partiyalarla görüşməsi digər müxalifət partiyalarında xoş qarşılanmayıb.
Modern.az diplomatik korpus təmsilçilərinin İP-lə görüşünə Klassik Xalq Cəbhəsi Partiyasının sədri Mirmahmud Mirəlioğlunun münasibətini öyrənib. İP haqqında fikir bildirmək niyyətində olmadığını deyən KXCP sədri əcnəbi diplomatların müxalifətçilərlə görüşə hansı missiya ilə getdiyini belə izah edib: “Qarşıdan “Eurovision” müsabiqəsi gəlir. Bunun üçün də ölkədə ictimai-siyasi sabitlik olmalıdır. Keçirilən son mitinqlər də ölkədə demokratik haqların necə bərqərar olduğunu göstərmək üçün bir fürsət oldu. Bu baxımdan, yəqin ki, həmin səfirlər İctimai Palataya təşəkkür etməyə getmişdilər”.
Modern.az
