Müsavat Partiyası qurultayla bağlı Bakı şəhər İcra Hakimiyyətinin cavabına etiraz edərək Türkiyə və Gürcüstan dövlətinə rəsmi müraciət hazırlayır. Partiyanın başqan müavini Gülağa Aslanlının Modern.az-a verdiyi məlumata görə, hazırda müraciətin hazırlanması prosesi gedir.
“Hazırda qurultay üçün Gürcüstan və Türkiyə dövlətinə məktub hazırlanır. Biz bu məsələni araşdırırıq. Qeyd edim ki, bu ölkələrdən hansı bizim təklifimizi qəbul edib razılıq verəcəksə, biz orada da öz qurultayımızı keçirdəcəyik”-deyə G.Aslanlı qeyd edib. Partiya rəsmisi hesab edir ki, qurultayın Gürcüstanda keçirilməsi maliyyə baxımından daha əlverişlidir: “Deməzdim ki, hansı ölkədə keçirməyi biz üstün sayırıq. Hansı ölkə bizim məktubumuza müsbət cavab verəcəksə, bu variant üzərində də işləyəcəyik. Ancaq xərcin az olması üçün qurultayın Gürcüstanda keçirilməsi daha yaxşı olar”.
