Albaniya “Eurovision-2012” mahnı müsabiqəsinin birinci yarımfinalını yayımlamayacaq. Modern.az “eurovision.az” saytına istinadan xəbər verir ki, Albaniyadakı avtobus qəzası zamanı yaşanan faciə ilə əlaqadar bu ölkə “Eurovision”un birinci yarımfinalını canlı yayımlamayacaq. Buna baxmayaraq Albaniya münsif səsverməsində iştirak edəcək. “Eurovision” mahnı müsabiqəsinin rəhbəri Yan Ola Sand avtobus qəzası zamanı yaşanan faciəyə kədərləndiklərini bildirib və qeyd edib ki, Albaniyanın şounun birinci yarımfinalını yayımlamamasına dair müraciəti müsbət dəyərləndirilib.
Onun sözlərinə görə, Albaniyanın bu qərarı ölkənin müsabiqədə iştirakına təsir etməyəcək və ölkə şounun ikinci yarımfinal və final mərhələlərini yayımlayacaq.
