Azərbaycan Respublikasının Ali Məhkəməsində «Baltika Baku» MMC ilə Gürcüstanın «Kapitalpoint» MMC arasında 1 ildən artıq davam edən iqtisadi mübahisəyə baxılıb. Ali Məhkəmədən verilən məlumata görə, AM-nin İnzibati İqtisadi Kollegiyası iş üzrə Sumqayıt Apellyasiya Məhkəməsinin 24 yanvar 2012-ci il tarixli qətnaməsindən hər iki şirkətin verdiyi kassasiya şikayətlərini təmin etməyib.
İki şirkət arasında məhkəmə çəkişməsi «Baltika Bakı» MMC-nin «Kapitalpoint» MMC-yə qarşı 1 il əvvəl Sumqayıt İnzibati-İqtisadi Məhkəməsində iddia qaldırması ilə başlayıb. «Baltika-Bakı» MMC 2009-2010-cu illərdə Gürcüstan bazarında satılmaq üçün «Kapitalpoint» MMC-yə pivə məhsulları göndərib. «Baltika-Bakı»nın iddiasına görə, «Kapitalpoint» göndərilmiş pivə məhsulunun dəyərinin bir hissəsini - 152 min ABŞ dollarını istehsalçı zavoda ödəməyib. İddia tələbi də məhz 152 min ABŞ dollarının «Kapitalpoint» MMC-dən tutularaq zavoda ödənilməsi ilə bağlı olub. Lakin «Kapitalpoint» MMC nəinki bu iddianı qəbul edir, əksinə «Baltika Bakı»ya qarşılıqlı iddia irəli sürüb.
«Kapitalpoint» MMC-nin iddiasına görə, «Baltika-Bakı»nın istehsal edərək Gürcüstana göndərdiyi «Arsenalnoe» və «Baltika» pivə məhsullarının böyük bir hissəsi keyfiyyətsiz olduğundan istifadəyə yararsız çıxıb. Halbuki həmin dövrdə pivə məhsullarının yararlılıq müddəti bitməyib. 2010-cu ilin sentyabr-dekabr aylarında «Kapitalpoint»in və «Baltika Bakı»nın rəhbərliyi arasında keyfiyyətsiz pivə məhsulları barədə müzakirələr aparılıb. «Baltika Bakı»nın rəhbərliyi (o vaxtkı direktor A.Tlexuray) istifadəyə yararsız pivələrin satışdan çıxarılaraq Bakıya göndərilməsini xahiş edib və öhdəsinə götürüb ki, yararsız məhsula görə «Kapitalpoint»ə dəymiş zərəri ödəyəcək. «Kapitalpoint» də öz nöbəsində artıq ticarət şəbəkələrinə paylanmış istifadəyə yararsız məhsulu anbarına yığaraq bu barədə zavoda məlumat verib. «Baltika-Bakı» və «Kapitalpoint» şirkətlərinin nümayəndələrinin iştirakı ilə keyfiyyətsiz məhsulların anbarlara yığılması aktlaşdırılıb. İstifadəyə yararsız pivə məhsulunun böyük bir hissəsi isə Gürcüstanın müvafiq dövlət orqanları tərəfindən zərərsizləşdirilib.
