İranda 3 aydan çox həbsdə saxlanıldıqdan sonra azadlığa buraxılan şairlər Fərid Hüseyn və Şəhriyar Hacızadənin sənəd problemi artıq həll olunub. Bu barədə Modern.az-a məlumat verən Şəhriyar Hacızadənin atası Mail Hacızadə bildirib ki, artıq şairlərin sənəd problemləri həll olunub onlar bu gün saat 11:00-da Azərbaycana qayıdacaqlar.
“Şükürlər olsun ki, Şəhriyar və Fəridin sənəd problemi həll olunmaq üzürədir. Mən bir qədər bundan öncə Şəhriyarla danışdım. O dedi ki, onlar hazırda konsulluqdadır. Saat 11:00-da konsullun müavini Nəriman müəllim öz maşını ilə onları İran Biləsuvarına kimi gətirəcək. Biz də gedib orada onları qarşılayacağıq. Inşallah saat 4-5 radələrində evdə olacaqlar”, - deyə M.Hacızadə bildirib.
Qeyd edək ki, azərbaycanlı şairlər Fərid Hüseyn və Şəhriyar Hacızadə İrana şeir festivalında iştirak üçün gedib və mayın 2-də orada həbs olunmuşdular.
Anar RÜSTƏMOV
