Azərbaycan Milli Elmlər Akademiyasının (AMEA) Mərkəzi Elmi Kitabxanasının yeni binası ilin sonuna hazır olacaq. Bu barədə Modern.az-a hazırda tikintisi gedən kitabxanadan məlumat verilib: “Dəqiq bilinmir ki, tam olaraq nə vaxta tikilib istifadəyə veriləcək, amma ilin axırına tikinti işlərinin bitməsi gözlənilir”.
Qeyd edək ki, müasir və qeyri-adi kitabxananın tikintisi üçün 0,9 ha torpaq sahəsi ayrılıb. Binanın ümumi sahəsi 38 000 kvadrat metr olacaq. Artıq binanın 4 mərtəbəsi tikilib. Binanın layihəçisi “Konstruktor”MMC, podratçısı “Azəraqrartikinti” ASC-dir. 5 mərtəbəli kitabxananın tikintisinə 2011-ci ilin oktyabr ayından başlanılıb.
Xatırladaq ki, prezident İlham Əliyev 2011-ci ilin mayın 20-də AMEA-ya Akademiyanın Mərkəzi Kitabxanasının yeni binasının tikintisinə başlamaq üçün 2 milyon manat vəsait ayırıb.
Nihadə Eyyubova
