Milli Məclisin yaz sessiyası artıq öz işinə başlayıb. Parlamentin ikinci plenar iclasının da zamanı müəyyənləşib. Fevralın 12-də olacaq iclasın gündəliyi də təsdiq olunub.
Modern.az parlamentin Mədəniyyət komitəsinin hansı qanun layihələrini hazırladığını öyrənməyə çalışıb. Komitənin sədri Nizami Cəfərovun sözlərinə görə, yaz sessiyasında komitənin işi o qədər də çox deyil.
“Yaz sessiyasında işimiz keçən sessiyadakından bir az azdır. Bu sessiyada daha çox cari işlərlə məşğul olacağıq. Xüsusilə “Muğam sənəti haqqında” Qanun layihəmiz hazırdır. “Aşıq sənəti haqqında”, “Memarlıq haqqında” Qanun layihələri isə hazırlanır”.
Komitə sədri qeyd edib ki, yaz sessiyasında daha ciddi qanunlar qəbul olunacaq. “Bunun səbəbi də odur ki, “Mədəniyyət haqqında” Qanun indi Prezidentin imzalanmasına verilib və hələ təsdiq edilməyib. Qanun qüvvəyə mindikdən sonra qanundan irəli gələn bir xeyli məsələlər var ki, onlara baxacağıq”.
Nizami Cəfərov bildirib ki, çalışacaqlar yaz sessiyasında adları çəkilən qanunlar plenar iclaslara çıxarılsın. “Çalışacağıq ki, bu qanun layihələri plenar iclaslara çıxarılsın. Çünki onlardan biri “Muğam sənəti haqqında” Qanun layihəsi demək olar ki, hazırdır”.
Qeyd edək ki, Mədəniyyət komitəsinin hazırladığı heç bir qanun layihəsi fevralın 1-də və 12-də keçiriləcək iclasların gündəliyinə salınmayıb.
Sevinc İltifatqızı
