Sakinlər Nizami Ələkbərov qarşısında problemlərin həlli tələbilə çıxış ediblər...
İsmayıllı rayon İcra Hakimiyyətinin başçısı N.Ələkbərov 23 yanvar hadisələrin yaranma səbəblərinin araşdırılması və gələcəkdə bu kimi hadisələrə yol verilməməsi baxımından şəhərin bir sıra müəssisə və məhəllələrində görüşlər keçirir.
Rayon İcra Hakimiyyətindən Modern.az saytına verilən məlumata görə, görüşlərdə çıxış edənlər dövlətə və dövlətçiliyə sədaqətlərindən söz açır, ismayıllıların bu istiqamətdə dəfələrlə sınanmış insanlar olmasından danışırlar.
Məlumatda bildirilib ki, məişət zəminində baş vermiş mübahisənin başqa məcraya yönəldilməsindən narahat olduqlarını söyləyən şəhər sakinləri bu görüşlərdə başçıdan bütün diqqətin mövcud problemlərin həllinə yönəldilməsini xahiş edirlər.
Çıxışlarda belə hadisələrin İsmayıllı üçün əsla xarakterik olmadığı, günahı olanların cəzalandırılmasının vacibliyi səsləndirilir. Keçirilən görüşlərdə rayon İcra Hakimiyyətinin başçısı N.Ələkbərov rayonun xidmət təşkilatları rəhbərlərinə çıxışlarda qaldırılan bir sıra problemlərin həlli ilə bağlı tapşırıqlar verib.
Rəsmi məlumata görə, son günlər şəhərin 3 və 5 saylı tam orta məktəblərində, Heydər Əliyev Mərkəzində, Natəvan küçəsindəki ”Xeyir-şər” evində keçirilən görüşlərdə 50-dən çox şəhər sakini çıxış edib.
Anar RÜSTƏMOV
