“Avropa İnsan Hüquqları Məhkəməsinə şikayət ərizəsinin hazırlanması prosesi uzun müddət aparır. Azərbaycan torpaqlarının işğalı nəticəsində məcburi köçkün düşmüş bir qrup azərbaycanlı jurnalistin şikayət ərizəsi hazırdır. Sadəcə bir neçə adamın sənədlərinin toplanması qalıb”.
Bu sözləri Modern.az-a açıqlamasında Media Hüququ İnstitutunun direktoru Rəşid Hacılı deyib. O, qeyd edib ki, Avropa Məhkəməsində heç bir məsələyə çox sürətlə baxılmır, onun baxılması xeyli vaxt aparır. “Şikayət hazırdır, bir neçə adamın sənədinin toplanması qalıb. Ərizə artıq hazırdır, bu sənədlər alınan kimi Avropa Məhkəməsinə iş göndəriləcək. Əgər sənədlər tapılsa, bir ay müddətinə ərizə Avropa Məhkəməsinə göndəriləcək”.
R.Hacılı eyni zamanda bildirib ki, ona bəlli olan informasiyaya görə Avropa Məhkəməsində hazırda bununla bağlı iki iş var. “Bunlardan biri ermənilər tərəfindən Azərbaycana qarşı qaldırılıb. Digəri isə Azərbaycan vətəndaşlar tərəfindən öz mülkiyyətindən məhrum edilməsi və öz mülkiyyətinə çatım imkanı ilə bağlı Ermənistana münasibətdə qaldırılıb. Bu işlərə baxılır və hələ qərar verilməyib”.
Qeyd edək ki, 2012-ci ilin yanvar ayında bir qrup jurnalist – Xalid Kazımlı, Etibar Seyidağa, Seymur Verdizadə, Məhəbbət Orucov, Aynur Elgünəş, Sevil Hilalqızı, Samir Kazımlı Ermənistan dövlətinin keçmiş Dağlıq Qarabağ Muxtar Vilayətinin hüdudlarından kənarda olan Qarabağ rayonlarını işğal etməsi nəticəsində onların mülkiyyət, yaşayış, təhsil və digər hüquqlarının zorakılıqla pozduğunu, maddi və mənəvi zərbəyə məruz qoyduğunu əsas göstərərək Avropa İnsan Haqları Məhkəməsinə rəsmi şikayət ünvanlayacaqlarını bəyan etmişdilər.
Aytən Əliyeva
