Azərbaycanın mərhum prezidenti Heydər Əliyevin 90 illik yubileyinin ölkə miqyasında təntənəli şəkildə keçirilməsi üçün hakim Yeni Azərbaycan Partiyası tərəfindən tədbirlər planı hazırlanıb. Bu barədə Modern.az-a YAP-ın icra katibinin müavini, millət vəkili Mübariz Qurbanlı məlumat verib.
Eks-prezidentin xatirəsinin yad edilməsi üçün hakim partiya tərəfindən xüsusi hazırlıqların getdiyini deyən M.Qurbanlı yubiley mərasimi ilə bağlı görüləcək işlərdən danışıb.
“Yeni Azərbaycan Partiyası ümummilli lider Heydər Əliyevin 90 illik yubileyinin keçirilməsi ilə bağlı xüsusi tədbirlər planını qəbul edib. Proqrama görə, biz Heydər Əliyevin 90 illik yubileyi ilə bağlı böyük bir konfrans keçirəcəyik. Konfransda Heydər Əliyevin irsinə dair məruzə dinləniləcək. Yubiley münasibəti ilə partiyanın rayon, şəhər təşkilatlarında tədbirlə keçiriləcək, ağacəkmə kampaniyası təşkil ediləcək. Həmçinin orta məktəb şagirdləri arasında inşa yazı müsabiqəsi keçiriləcək. Hər bir rayon təşkilatında Heydər Əliyev irsinin öyrənilməsi ilə bağlı tədbirlərimiz olacaq. Yubiley tədbirləri ilə bağlı Yeni Azərbaycan Partiyası hazırlıqlarını davam etdirəcək”,-deyə YAP-çı deputat vurğulayıb.
Qeyd edək ki, mərhum prezident Heydər Əliyevin 90 illik yubileyinin ölkə miqyasında keçirilməsi üçün ölkə başçısı tərəfindən sərəncam imzalayıb.
Anar RÜSTƏMOV
