Azərbaycanda kənd təsərrüfatının inkişafı istiqamətində həyata keçirilən ərzaq təhlükəsizliyi və “Regionların sosial-iqtisadi inkişafı haqqında” dövlət proqramları ərzaq təhlükəsizliyinin təminatı istiqamətində atılmış mühüm addımlar hesab olunur. Ərzaq təhlükəsizliyi məsələsi ölkə əhalisini təmin edəcək həcmdə məhsulun istehsalı və emalı potensialının mövcudluğu, ölkə əhalisi tərəfindən istehlak edilən ərzağın keyfiyyəti, dövlət əhəmiyyətli strateji ərzaq məhsullarının ölkədaxili istehsalı kimi komponentləri özündə birləşdirir.
Azərbaycanın hər bölgəsində olduğu kimi Füzuli rayonunda da son illər kənd təsərrüfatı məhsullarının istehsalı, tədarükü və emalında ciddi uğurlar əldə olunur. Kənd təsərrüfatı rayonu olan Füzulidə iqtisadiyyatın əsasını taxılçılıq və heyvandarlıq təşkil edir.
Rayon İcra Hakimiyyətindən verilən məlumata görə, həyata keçirilən aqrar islahat nəticəsində rayonun işğaldan azad olunmuş kəndlərində ədalətli bölgü prinsipi əsasında hər bir ailə pay torpaqları ilə təmin olunub. Torpaq islahatı insanların torpağa bağlılığını daha da artırmış, onların öz torpaqlarından daha səmərəli istifadə etmələrinə stimul yaradıb. Bütün bunlar rayon sakinlərinin ilk növbədə maddi rifahlarını xeyli yaxşılaşdırıb.
”Böyük taxılçılıq ənənələri olan rayonda məhsul istehsalı ilbəil artırılır, məhsuldarlıq yüksəldilir. Taxılçılıqdakı uğurlarımız bu ildə ürəkaçandır. Rayonda mühüm ərzaq məhsulu olan taxılçılığın inkişafı xüsusilə son illər diqqət mərkəzindədir”.
Rayonda taxıl biçini ilə əlaqədar fəaliyyət göstərən qərargahın sədr müavini, İcra Hakimiyyəti başçısının aqrar məsələr üzrə üzrə müavini Hüseyn Abbasov isə deyir ki, builki nəticələr də sevindiricidir:
“39,7 min hektar sahədən məhsul nəzərdə tutulmuş müddətdə biçilib, 111 min ton taxıl əldə edilib ki, bu da rayonun tarixində rekord göstəricilərdən sayılır. Rayonun tarixində ilk dəfə olaraq keçən il 101 min ton, bu il isə 111 min ton taxıl istehsal olunub. Hər hektarın məhsuldarlığı 28 sentnerə yaxın olub. Rayonda gələn il üçün məhsul istehsalının qayğısına indidən qalınır. Prezident cənab İlham Əliyevin taxılçılığın inkişaf etdirilməsinə dair göstərişindən sonra rayonda 300 hektar sahədə məhsuldar toxumluq təsərrüfatı yaradılıb və bu il həmin sahələrdən 53-55 sentner taxıl götürülüb. Yaxın gələcəkdə taxılçılıq rayonda yetişdirilən elit növ toxum hesabına inkişaf etdiriləcək”.
İcra başçısının müavini deyir ki, həmişə olduğu kimi, füzulilərin çörəklə bağlı problemləri olmayacaq.
Modern.az
