YAP Gəncə təşkilatının sədri: Hansı məsuliyyəti daşıdığımı dərk edirəm | Modern.az

Yeni Azərbaycan Partiyasının Gəncə şəhər təşkilatına yeni təyin olunmuş sədr  Naqif Həmzəyev yeni vəzifədə görəcəyi işlər haqqında Modern.az-a danışıb. O, Yeni Azərbaycan Partiyası Gəncə şəhər təşkilatının sədri kimi üzərinə düşən məsuliyyəti dərk etdiyini söyləyib.

“İlk növbədə mənə göstərilən böyük etimada görə, ölkə prezidenti, partiyamızın sədri, cənab İlham Əliyevə dərin minnətdarlığımı bildirir, məni dəstəkləyən bütün siyasi həmfikirlərimə təşəkkürümü çatdırıram.

Yeni Azərbaycan Partiyası Gəncə şəhər təşkilatının sədri kimi məsul vəzifənin səlahiyyətlərini qəbul edərkən, üzərimə düşən məsuliyyəti dərk edir, siravi partiya üzvü kimi bundan sonra da partiyanın Nizamnamə tələblərini və Proqram prinsiplərini dönmədən yerinə yetirəcəyəm. Hər kəsi əmin edirəm ki, ulu öndər Heydər Əliyevin siyasi kursuna daim sadiq qalacaq, ölkəmizin güclənməsi və qüdrətlənməsi yolunda bütün qüvvə və bacarığımı səfərbər edəcəyəm. Partiyamızın sədri, cənab İlham Əliyevin partiya üzvləri qarşısında qoyduğu vəzifələrin yerinə yetirilməsinə, partiya daxili intizamın qorunmasına və tapşırılan işə məsuliyyətin artırılmasına, siyasi həmrəyliyin təmin edilməsinə bütün varlığımla çalışacağam”-deyə Naqif Həmzəyev bildirib.   

Yeni Azərbaycan Partiyasının Gəncə şəhər təşkilatının VII konfransında təşkilatın sədri İsrafil İsmayılov öz ərizəsi ilə vəzifəsindən azad edilib. Təşkilatın sədri vəzifəsinə Gəncə şəhər Kəpəz rayon İcra Hakimiyyəti başçısının müavini Naqif Həmzəyevin namizədliyi irəli sürülüb və seçilib. 

 

Gültəkin ƏLƏSGƏR