Xəbər verdiyimiz kimi, bu gün Modern.az İnformasiya Agentliyi və "Nar Mobile" şirkətinin birgə təşkilatçılığı ilə ali məktəblərə qəbul imtahanında ən yüksək bal toplayan abituriyentlərlə görüş keçirilib.
Görüşdə yüksək bal toplayan 10 abituriyent iştirak edib. Onlar mükafatlandırılıb.
Modern.az onlardan bir neçəsinin tədbirlə bağlı fikirlərini öyrənib.
Qəbul imtahanında 692 bal yığan Cavid Nəzərov saytımıza belə bir tədbirə dəvət olunduğuna görə sevincli olduğunu deyib:
"Mən təhsilimi Bakı Ali Neft Məktəbində informasiya təhlükəsziliyi ixtisası üzrə davam etdirməyi düşünürəm. Baklavr pilləsini bitirdikdən sonra magistratura və doktoranturada təhsil akmaq istəyirəm. Ancaq bu təhsil pillələrini ölkə daxilində, yoxsa ölkə xaricində oxumağa hələ qərar verməmişəm. Yüksək bal toplayanlar üçün təşkil olunan bu tədbirə dəvət olunduğum üçün sevincli, eyni zamanda həyəcanlıyam".
Fərman Salmanov adına tam orta məktəbin məzunu, qəbul imtahanında 686 bal yığan Məhin Əliyeva yüksək nəticə ilə fərqlənməyin insanı xoşbəxt etdiyini vurğulayıb:
"Mən Bakı Ali Neft Məktəbinin informasiya təhlükəsizliyi ixtisasına qəbul olunmuşam. Magistr pilləsi üzrə isə oxuyub-oxumayacağım dəqiq deyil. Təəssüratlarım olduqca yaxşıdır. Bu gün belə bir tədbirə dəvət olunmağım mənim üçün çox əlamətdar hadisədir. 10 nəfərdən biri olmaq çox yaxşı haldır. İnsan düşünür ki, çəkilən əmək boşuna getmədi. Məndən aşağı bal yığıb mənimlə eyni ixtisasa qəbul olunanlar var. Yüksək bal yığıb onlardan fərqləndiyini bilmək insanı xoşbəxt edir".
Naxçıvan Respublikası Şərur rayonundakı Kürçülü kənd tam orta məktəbinin məzunu Mikayıl Cəfərli tədbirə dəvət olunmasına görə təşəkkürünü bildirib:
"690,7 balla II ixtisas qrupu üzrə respublika birincisi olmuşam. Təhsilimi Türkiyədə davam etdirəcəm - Koç universitetindən qəbul dəvəti almışam. Bu universitetdə biznesin idarə etdilməsi ixtisası üzrə təhsil alacam. Gələcək abituriyentləri təhsildə daim özlərini inkişaf etdirməyə, dərslərlə yanaşı, ümumi dünyagörüşlərini artırmağa çağırıram. Belə bir tədbirdə olmaq mənim üçün qürurvericidir. Çünki respublika üzrə ən yüksək bal toplayan 10 tələbə dəvət edilib. Mən də bu 10-luqdayam. Təşkilatçılara təşəkkür edirəm".
