Avropa Liqasının avqustun 29-da keçiriləcək “pley-off” mərhələsində “Qarabağ” klubuna 3 min azarkeş dəstək verəcək. Almaniyanın “Ayntraxt” klubu ilə qarşılaşacaq Ağdam təmsilçisi üçün səfər oyununda məhz bu qədər azarkeş yeri ayrılıb. “Qarabağ”ın mətbuat xidmətinin rəhbəri Nurlan İbrahimovun Modern.az-a verdiyi məlumata görə, rəqib komanda artıq bunun üçün Ağdam təmsilçisinə 3000 bilet göndərib.
N. İbrahimov bildirib ki, biletlər Azərbaycandan, eləcə də Avropanın ayrı-ayrı şəhərlərindən oyunu canlı seyr etmək istəyən azarkeşlərə satılacaq. Biletin qiyməti yerindən asılı olmayaraq, 17 avrodur.
Yeri gəlmişkən, ASAIF (Xaricdə Təhsil Alan və Məzun Olmuş Azərbaycanlı Gənclərin Beynəlxalq Forumu) və “Qarabağ” Futbol Klubu “Hamımız Qarabağla” devizi altında komandamızı Almaniyadakı oyunda dəstəkləmək üçün xaricdə təhsil alan gəncləri matçı izləməyə dəvət edib. Bu müraciət xüsusilə Almaniyadakı azərbaycanlı gənclərə ünvanlanıb.
“Bu matçı izləmək istəyənlər 08.25.2013-ci il tarixinə qədər ASAIF - ə müraciət edərək biletləri pulsuz əldə edə bilərlər. Bunun üçün [email protected] elektron ünvanına müraciət edə bilərsiniz. Hər kəsi ‘Qarabağ’ Futbol komandamıza tam dəstəyə dəvət edirik”-deyə ASAİF bəyan edib.
Qeyd edək ki, ilk oyun avqustun 22-də Bakıda, Tofiq Bəhramov adına Respublika stadionunda, cavab qarşılaşması bir həftə sonra Almaniyada baş tutacaq.
İntiqam Valehoğlu
