2013-cü il oktyabrın 9-da Azərbaycanda keçiriləcək prezident seçkisində iştirak etmək üçün Mərkəzi Seçki Komissiyasına müraciət edən namizədlərin sayı günbəgün artır. Artıq 14 nəfərin namizədliyi MSK-da təsdiqlənib.
Modern.az-a açıqlamasında YAP icra katibinin müavini, millət vəkili Siyavuş Novruzov qeyd edib ki, Prezident İlham Əliyev üçün imzatoplama kampaniyası tam başa çatıb. Avqustun 20-də imza vərəqələri MSK-ya təqdim olunacaq. YAP-ın əsas seçki şüarları da artıq hazırdır.Təbliğat-təşviqat kompaniyası zamanı şüarların açıqlanacağını deyən partiya S. Novruzov bildirib ki, sentyabrın 16-da İ.Əliyevin seçki platforması cəmiyyətə təqdim olunacaq. Ümid Partiyasının sədri, millət vəkili İqbal Ağazadənin seçki qərargahına rəhbərlik edən Taleh Əliyevin sözlərinə görə, bu günə qədər 41 mindən yuxarı imza yığılıb. O, qeyd edib ki, artıq imza vərəqələrini seçki qərargahında imzaları ilkin yoxlama prosesi gedir.
Partiya rəsmisinin seçki şüarlarını da açıqlayıb.“Ümid Partiyasının əsas seçki şüarı “Dəyişək!” olacaq. Bunun geniş anlamda izahı ondan ibarətdir ki, yaşayış tərzimizi, həyatımızı və siyasi hakimiyyəti dəyişək. Bununla da Azərbaycana yeni ümidli hakimiyyət bəxş etmək istəyirik”, –deyə T. Əliyev vurğulayıb.
Azadlıq Partiyasının sədri, prezidentliyə namizəd Əhməd Oruc isə hələlik şüarla bağlı bir açıqlama verməsə də, imzatoplama ilə bağlı məsələyə aydınlıq gətirib.
Onun sözlərinə görə, hazırda regionlarda imza toplanışı gedir. Bunun çətin bir proses olduğunu dilə gətirən partiya sədri qeyd edib ki, seçki qərargahına rəhbərliyi Fərhad Qarayev edir. “A13” Hərəkatından prezidentliyə namizədliyi irəli sürülmüş Ərəstun Oruclunun seçki qərargahında başçı qurumun idarə heyətinin üzvü Zaur Əkbərdir. Ərəstun Oruclu bildirib ki, şüarla bağlı bir neçə versiya üzərində işlənilir. Hazırda əsas məsələ imzaları toplayıb MSK-ya zamanında təhvil verməkdir. Seçki təbliğatının ümumi konturları barədə də danışan təşkilat sədri vurğulayıb ki, əsas gücü əhali ilə görüşlərə verəcəklər. Prezidentliyə namizədin sözlərinə görə, internet resursları ilə də təbliğat işi prioritet təşkil edəcək. “Bunu video-kliplər şəklində həyata keçirəcəyik”.
ASDP sədri Araz Əlizadə onlara imza vərəqləri keçən həftənin şənbə günü verildiyini əsas gətirərək bildirib ki, bank hesabı açmayıblar. “Sabahdan partiya üzvləri imza toplamağa start verəcək”.
Partiya sədri əlavə edib ki, imza toplanılıb qeydiyyatdan keçdikdən sonra isə şüar və platformaları aydınlaşacaq. Araz Əlizadənin seçki qərargahına isə partiyanın təbliğat-təşviqat məsələləri üzrə müavini Təhməz Məmmədov rəhbərlik edir.
MDHP sədri, millət vəkili Fərəc Quliyevin seçki qərargahına onun birinci müavini Bayram Abbasov rəhbərlik edir. “2-3-gün ərzində 45 min imza toplamaq şansları var.
Təbliğat-təşviqat kampaniyası zamanı şüar da bəlli olacaq. Xatırladaq ki, imza toplama kampaniyası üçün son tarix sentyabrın 9-dur. Bu vaxta qədər imza vərəqələrini təqdim edən namizədlər bundan sonra MSK tərəfdən qeydə alınaraq təbliğat-təşviqat kampaniyasına başlaya biləcəklər.
Aqşin Kərimov
