“Nazirliyə məxsus qayıqlarda, skuterlərdə peşəkar sürücülük vəsiqəsi olanlar çalışır”. Bunu Modern.az-a açıqlamasında Fövqəladə Hallar Nazirliyinin Dövlət Xilasetmə Xidmətinin sektor müdiri Mənsur Piriyev bildirib. O, dünən Türkan çimərliyində skuterlərdən istifadə zamanı baş verən hadisəyə münasibət bildirərkən deyib ki, FHN-in skuter idarə edən şəxsləri heç zaman elə hadisəyə yol verə bilməzlər”. Çünki onların hamısına nəzarət olunur. Suyun içərisində olan bütün texnikalar FHN-ə aid deyil. O qədər istirahət obyektləri var ki! Çimərliklərə gəlincə, onların özlərinin də skuterləri var. Qayıqlar, skuterlər təkcə xilasedicilərə aid deyil. Ona görə də üzərinə Fövqəladə Hallar Nazirliyi yazılan və orda nömrəsi olan qayıqlara fikir vermək lazımdır.
Mənsur Piriyev bəzi çimərliklərdə saxta skuterlərin fəaliyyətinə də toxunub: “Elə hallar ola bilməz. Çünki onlara da müvafiq qurumlar tərəfindən nəzarət olunur. Bəzən çimərliklər, istirahət obyektləri var ki, pul qazanmaq üçün belə skupterləri suya buraxırlar. Özümüz həmin skupterləri çimərlik ərazisindən çıxarırıq. Təhlükəsizlik qaydaları içərisində olan məsələlərdən biri də budur ki, çimərlik ərazisinə heç bir texnika ilə daxil olmaq olmaz. Doğrudur, istirahət obyektlərinin bəziləri skuterləri müəyyən ödəniş qarşılığında 10 dəqiqəlik, yarım saatlıq icarəyə verirlər. O zaman təəssüflər ki, həmin adamın sürücülük vəsiqəsinin olub-olmamasına baxmırlar.
Dövlət Sularda Xilasetmə Xidmətinin qayıqlarını sürən adamlar isə peşəkar kurs keçmiş motorçu, sükançı diplomu almış şəxslərdir. Eyni zamanda, qayıqları, gəmiləri sürmək üçün vəsiqələri var. Təəssüflər olsun ki, bəzi istirahət obyektlərində sürücülük vəsiqəsini skuterləri sürən adamların əksəriyyətinin 18 yaşı tamam olmamış şəxslərə verirlər”. Sektor müdiri deyir ki, istirahət mərkəzlərində bu cür hallar baş verərkən məsuliyyəti həmin skuterin sahibi daşımalıdır. “Konkret olaraq birbaşa məsuliyyəti qayığı suya buraxan, həmin qayığı alan istirahət obyekti daşıyır. Skuterin sahibi kimdirsə, cavabdehlik ondadır”.
Namidə BİNGÖL
