Milli Şuranın sessiyasından ən son xəbər budur ki, sədr R. İbrahimbəyov iclasa qatılıb. Selektor sistemi ilə Şura üzvlərinə müraciət edən İbrahimbəyov deyib ki, qurum bu gün hansı qərarı qəbul etsə, onu dəstəkləyəcək.
Hazırda Müsavat Partiyasının qərargahında Demokratik Qüvvələrin Milli Şurasının növbəti sessiyası keçirilir. Mətbuata qapalı keçirilən sessiyada Milli Şuranın layihə kimi hazırlanan memorandumu təqdim olunub. Modern.az xəbər verir ki, musavat.com-un iclasda iştirak edən müxbirinin Milli Şura üzvlərindən aldığı məlumata görə, memorandumda Milli Şura sədri Rüstəm İbrahimbəyovun qeydiyyata alınması ilə bağlı mövcud olan süni əngəlləri, onun üzvlərinə müraciətini və təkliflərini, eyni zamanda qurumun seçkilərdə iştirak etmək niyyətini nəzərə alaraq qeyd olunur ki, Milli Şura sədri R. İbrahimbəyovun prezidentliyə namizədliyi sona kimi dəstəklənsin; əgər Milli Şuranın seçki prosesindən kənarda qalmaq təhlükəsi olarsa, qurum üzvü olan potensial namizədlərin prezident seçkilərində iştirak etməsi məqsədəuyğun sayılsın. Eyni zamanda, layihəyə görə, seçki prosesinə qatılan Milli Şura üzvləri bir sıra öhdəliklər qəbul edirlər. Məsələn, Rüstəm İbrahimbəyovun namizədliyi qeydə alındığı təqdirdə öz namizədliyini geri götürmək, seçki kampaniyasında Milli Şuranın 7 iyul 2013-cü il tarixində qəbul etdiyi Təsis Bəyannaməsində və digər sənədlərdə ifadə olunmuş müddəaları əsas platforma kimi qəbullanmaq, səsvermə gününə az müddət qalmış, qanunun tələbləri nəzərə alınmaqla irəli sürülən digər namizədlərlə və Milli Şura ilə razılaşmalar arasında 2 iyul 2013-cü il tarixli memorandumda əks olunmuş öhdəliklərlə razılaşan ən şanslı namizədin xeyrinə öz namizədliyini geri götürmək.
