Payızda öz qurultayını keçirəcək AYB filiallarının ümumi vəziyyəti və onların fəaliyyəti ilə bağlı bəzi məqamlar oxuculara çatdırılmışdı. Modern.az yenidən bu mövzuya qayıdaraq 14 filialından ikisi Şəki və Mingəçevir bölmələrindəki duruma diqqət yetirir:
Vaqif Aslan (AYB-nin Şəki filialının rəhbəri): “Yazıçılar Birliyinin Şəki filialı bir növ fəaliyyətsiz durumdadır. Səbəbi odur ki, bir yerə yığışmaq üçün otağımız belə yoxdur. 3 il bundan əvvəl burda çox gözəl bir mühit var idi. Adamlar hər yerdə çap olunurdu, müxtəlif mətbu orqanlara əsərləri təqdim edirdik. Lakin bu gün bir yerə yığışa bilmirik. Elə bu üzdən də xeyli çətinliklərimiz var. Şəki televiziyasında “Məclisi-şüəra” deyilən bir şey yaradıblar. Ayda bir dəfə ora yığışıb söhbət edirlər. 15-20 üzvümüz var. Amma mən yenə də bu zonada yerləşən rayonlara Zaqatalaya, Qaxa, Oğuza, Balakənə bir-bir gedərək orda ədəbi yığıncaqlar keçirmişəm. Şəkidə mətbəə yoxdur deyə mətbuat orqanımız da yoxdur. Bunu AYB sədri Anar da bilir”.
İsmayıl İman (Mingəçevir filialının rəhbəri): “Filiallardan xəbərsiz olanlar deyirlər ki, filiallar donuq vəziyyətdədir. Bu bir az haqsızlıqdır. Öz timsalımızda deyirəm ki, bizdə həm uşaqlar üçün (“Mingəçevir qönçələri”), həm də böyüklər üçün ədəbi məclis var. Ayda iki dəfə yaradıcılıq günlərimiz keçirilir. Əsas məsələ odur ki, filiallar öz fəaliyyətində azaddır, o qədər də təzyiq olmur. Özümüzün ədəbi-bədii jurnalımız var. May ayının 6-da jurnalın 5 yaşını keçirtdik, paytaxtdan da qonaqlarımız gəlmişdi. İyul ayının 6-da da AYB-nin “Natavan” klubunda jurnalın yubileyini qeyd etdik. İndi də keçək problemlərə .
Ən böyük problemimiz əmək haqqının olmamasıdır. Sovet hökuməti illərində yaradılan filiallarda – Gəncədə, Naxçıvanda, Lənkəranda, Qazaxda elə o vaxtdan əmək haqqı olub. Çox qəribədir ki, müstəqillik dönəmində yaranan Quba, Aran, Mingəçevir, Şəki, Şirvan filiallarının heç birində əmək haqı yoxdur. Bir Sumqayıtı çıxmaq sərtiylə. 1999-cu il oktyabrın 22-dən filialın kommunal xərclərini şəxsən ailə büdcəmdən ödəyirəm. Ən böyük problemimiz budur. Deputat Nizami Cəfərova da zəng edib bu məsələ haqqında danışmışam. “Yaradıcı təşkilatlar haqqında” qanun layihəsində bəlkə filiallara da nəsə bir işıq düşəcəyini dedi“.
Elmin Nuri
