“2013-2014-cü tədris ilinə az faizlə çap ediləcək monitorinqi aparılmış II, IV və VII sinif dərsliklərində redaktə və korrektə işləri aparılıb”. Modern.az xəbər verir ki, bu barədə Təhsil Nazirliyinin yaydığı məlumatda bildirilir. Qeyd edilir ki, dərsliklər növbəti illərdə tam tirajla çap olunarkən monitorinqin nəticələri nəzərə alınacaq. “Bu il təqdim ediləcək VI sinif dərslik komplektləri kurikulum əsasında hazırlanmış ilk dərsliklərdir. VIII, IX və X sinif dərsliklərinin də bir qismi daxil olmaqla, bütövlükdə 2013-2014-cü tədris ilinə ümumtəhsil məktəblərinə 139 adda dərslik və müəllim üçün metodik vəsait veriləcək”.
Nazirlik eyni zamanda orta təhsilini Avropa ölkələrindən birində almış şəxslərin Azərbaycanda hansısa ali və orta ixtisas təhsili müəssisəsinə sənəd verə bilməsi məsələsinə də aydınlıq gətirib. Bildirilib ki, Avropa ölkələrində orta təhsil almış şəxs ərizə ilə birlikdə təhsil sənədini Təhsil Nazirliyinə təqdim etməlidir. Yalnız xaricdə verilən təhsil sənədinin Azərbaycandakı müvafiq təhsil sənədinə ekvivalentliyi müəyyən edildikdən sonra həmin şəxs mövcud qaydada ali və ya orta ixtisas təhsili müəssisəsinə qəbul oluna bilər.Eyni zamanda müəllimlərin dövlət qulluqçusu statusunun verilməsini də qeyd edən nazirlik bildirib ki, 2011-ci ildə "Dövlət büdcəsindən maliyyələşdirilən təhsil və səhiyyə müəssisələrində işin dövlət qulluğunun xüsusi növünə aid edilməsinə dair Konsepsiya" layihəsinə Təhsil Nazirliyi tərəfindən müvafiq rəy verilib.
Aytən ƏLİYEVA
