Modern.az Yazıçılar Birliyinin tabeliyində olan filiallardakı problemləri gündəmə gətirəndən sonra bəzi məsələlər aşkara çıxdı. Bir filialın kommunal xərcləri, digərinin isə ümumiyyətlə otaqlarının olmadığı aydınlaşdı. Mingəçevir filialının rəhbəri AYB-dən heç olmasa kommunal xərclərin ödənilməsi üçün maddi yardım edilməsini istədi.
AYB-nin birinci katibi, xalq şairi Fikrət Qoca isə bildirir ki, Birlik ümumiyyətlə filiallara pul ayırmamalıdır. “Rayonlardakı yazıçılar ziyalı olaraq öz bölgələrinin yığıncaqlarında, tədbirlərində iştirak edib onların rifahı üçün çalışmalıdır. Yazıçılıq bir sənətdir, birtərəfli qəbul olunmamalıdır. Rayonda yaşayan ziyalı yazıçıların da biri müəllim, biri həkim, digəri isə ayrı sənətin adamıdır. Onlar öz ixtisasları ilə pul qazanmalıdırlar. Həmin adamlar, yəni yazıçılar yığışaraq Birliyə müraciət edirlər ki, hər dəfə Bakıya gələ bilmərik.
Xahiş edirik 5 rayonu əhatə edən bir filial yaradın. Bu müraciətin əsasında orda filial yaradılır. Birlik rəsmiləri də filial yaradılmamışdan əvvəl rayona gedirik, vəziyyəti öyrənib icra başçısı ilə görüşürük. Onlar da canla-başla razılaşıb yazıçılar üçün buna uyğun şərait yaradırlar. Rayon icra başçısı da razılışır və onlara otaq verilir. Yazıçılığa ayrıca maaş yoxdur ki! Bizə hələ çox sağ olsun, Prezident təqaüdlər verir. “Sovet dövründə yaradılan filiallara AYB tərəfindən maliyyə yardımı edilirdi” iddiası yanlışdır. Yazıçılar Birliyinin Rusiyada, İsraildə də filialları var. Yəni onlara da maaş verməliyik?!”
Elmin Nuri
