Masazır qəsəbəsində məcburi köçkünlər üçün tikilən binalardan ikisində çat yaranıb. Köçürülmə prosesində iştirak edən şəxslərin Modern.az-a verdiyi məlumata görə, həmin ərazi sürüşmə zonası olduğu üçün binaların çökməsi təhlükəsi yaranıb. Buna görə də məcburi köçkün şəhərciyinə köçürülmə prosesi dayandırılıb.
Qaçqın və Məcburi Köçkünlərin İşləri üzrə Dövlət Komitəsinin mətbuat xidmətinin rəhbəri Elçin Qədimov isə Modern.az-a açıqlamasında bunun tamamilə əsassız məlumat olduğunu bildirib.Xatırladaq ki, Məcburi Köçkünlərin Sosial İnkişaf Fondu tərəfindən Azərbaycan Dövlət Neft Akademiyasının tələbə yataqxanasında məskunlaşmış 760 ilə üçün Masazırda 13 ədəd beşmərtəbəli binada ibarət yeni şəhərcik salınıb. Həmin binaların 12-i 60, 1-i isə 40 mənzildən ibarətdir. Binalardakı mənzillərdən 90 ədədi 1 otaqlı, 490-ı 2, 170-i 3, 10-u isə 4 otaqdan ibarətdir.
Mənzillərin ümumi sahəsi 53 min 206 kvadratmetrdir. Burada həmçinin 540 yerlik üçmərtəbəli məktəb binası, 280 çarpayılıq uşaq bağçası, poçt şöbəsi, tibb məntəqəsi, klub-icma mərkəzi, 4 qazanlı istilik qazanxanası, 2 elektrik yarımstansiyası, 2 ədəd 500 kubmetrlik içməli su anbarı, 2 ədəd yanğın əleyhinə su anbarı da inşa olunub.
Aytən ƏLİYEVA
