Modern.az “Rayonlardakı vəziyyət: Deputat və jurnalist danışır” layihəsini davam etdirir. Bu dəfə seçilən bölgə Şamaxıdır. Bu bölgə haqqında 85 saylı Şamaxı seçki dairəsindən seçilmiş deputat Elxan Süleymanov və əslən Şamaxıdan olan “Gündəlik Telaqraf” qəzetinin redaktoru Qurban Yaquboğlu danışır.
Deputat Elxan Süleymanov bildirir ki, Şamaxıda problemlər çoxdur. “Mərzəndiyə, Dəmirçi, Qəleybuğurd, Qaladərəsi və digər kəndlərin gərgin yol problemi var. Ancaq yuxarı dağ kəndlərində, ümumiyyətlə payızda bütün əlaqələr kəsilir. Bu may ayına qədər belə davam edir. Eyni zamanda Ərçiman kəndinin yanında nəhəng çay var. Onun üstündə körpü yoxdur. Şamaxının demək olar ki, bütün kəndlərində su problemi var. Bunları həll etmək lazımdır. Elektrik dirəkləri 1948-54-cü illərdə çəkilmiş dirəklərdir ki, onların hamısı sınıq-sökükdür. Şamaxıda əhalinin bir hissəsi üzümçülüklə məşğuldur. İnsanların şikayəti işsizliklə bağlı olur.
Yol, su, işıq, işsizlik həyatın əsas problemləridir. Mirzə Ələkbər Sabirin 150 illik yubileyi münasibəti ilə 6 kəndə su çəkdirmişəm. Cabanı, Göylər, Meysəri, Adnalı, Bağırlı kəndində su var. Məlhəm və Sabirli kəndində də bu proseslər gedir. Xırda problemləri bacardığım qədər həll etməyə çalışıram. Ancaq qlobal problemlərin hamısını icra strukturları etməlidir. Onlara yazılan məktublara isə cavab verilmir. Elektrik problemi ilə bağlı deputat olduğum vaxtdan etibarən dəfələrlə müraciət etməyimə baxmayaraq, məktublarımın hamısı cavabsız qalıb.
Onların həlli üçün dövlət tədbirlər görülməlidir. Problemlər üst-üstə yığılıb qalır və bu da əhalinin narazılığına səbəb olur”. Jurnalist Qurban Yaquboğlu deyir ki, Şamaxının problemləri digər bölgələrin problemlərindən fərqlənmir. “İstehsal müəssisələri yoxdur, kənd təsərrüfatı çöküb, işsizlik hökm sürür. Əhalinin miqrasiyası baş verir. Vaxtilə rayonun əsas böyük kəndlərindən olan Göylər kəndinin baş yolundakı tünlükdən, adam sıxlığından maşınlar keçə bilmirdi. İndi həmin küçədə tək-tük adam gözə dəyir. Kəndlə rayon mərkəzi arasında 17 kilometrlik yol təmir adı ilə bərbad duruma salınıb. 2 ildir camaat əziyyət çəkir.
Ən maraqlısı odur ki, həmin yolla vaxtilə icra başçısının 2 müavini hər gün işə gedib gəlirdi. İndi deyəsən onlardan biri vəzifədən çıxıb. İnsanlar çox istəyirlər ki, Göylər-Şamaxı yolu düzəlsin. Bakı-Şamaxı yolu da neçə ildir ki, təmirdədir. Asfaltlanır, sonra nə isə çatışmır, təzədən təmir işləri başlayır. Ümid edirik ki, nə zamansa Şamaxı-Bakı magistral yolu tam qaydaya düşəcək. Şamaxı tarixi baxımdan mühüm şəhər, daha doğrusu dövlət paytaxtı olub. Fikrimcə, onun tarixi statusunu müəyyən qədər bərpa etmək, regional-mədəni mərkəz kimi inkişaf etdirmək pis olmaz. Təəssüf ki, indi Pirqulu dağı yalnız məmur istirahət mərkəzinə çevrilib. Öz vətənini sevən hər kəs ilk növbədə oranın gözəlləşdirilməsi üçün çalışmalıdır”.
Ulduz İBRAHİMOVA
