“Siyasətdən başı çıxmayanlar, heç prezidentin səlahiyyətlərinin nə olduğunu bilməyənlər öz namizədliklərini verirlər. Onlardan bəziləri mənim ünvanıma danışmaq istəyirlər. Amma bu onlar girən kol deyil”. Bunu Modern.az-a açıqlamasında Müasir Müsavat Partiyasının sədri, prezidentliyə namizəd Hafiz Hacıyev deyib. O bildirib ki, prezidentliyə namizədlər içərisində özünə rəqib tanımır.
“Azərbaycanda bu gün ən güclü siyasətçi İlham Əliyevdir”, – deyən partiya sədri müxalifətin bostanına da daş atmağı yaddan çıxarmayıb. O, müxalifəti nəzərdə tutaraq, ağır ittiham səsləndirib.
“Mən gözləyirəm ki, görüm bu satqınlar şurasından kimlər namizədliyini verəcək. Onlarla rəqib olub mübarizəni davam etdirmək niyyətindəyəm. Bu adamlar 4 min imza toplaya bilməzlər. Onlar televiziya vasitəsilə ölkə başçısının əleyhinə lazım olmayan ifadələr işlətmək niyyətindədirlər. Həmin partiyaların gizli anlaşmaları var. Adlarını çəkmək istəmirəm. Çox yanlış yoldadırlar”.
Partiya sədri qeyd edib ki, ona qarşı kampaniya aparanlar müəyyən dairələrdən əmr alırlar.
“Lakin onlar bilməlidir ki, Hafiz Hacıyevlə ayaqlaşa bilməzlər. Həmin şəxslər heç mənim ayağımın tozu da deyillər. Mən imkan verməyəcəyəm ki, satqın, şər, xalqını qəpik-quruşa satan qüvvələr mənə qarşı mübarizə aparsın”.
O ad çəkməsə də bildirib ki, hakimiyyətdəki bəzi qüvvələr İlham Əliyevin iradəsinin əksinə getmək istəyirlər.
”Amma bu mümkün olan iş deyil. Şarlatanlar bilməlidir ki, onların qabağında duran ləyaqətli bir kişi var. Həmin uşaq-muşaq bizim bağa girə bilməyəcək. Seçkidə xalq da görəcək ki, mən həmin qüvvələri məhv edəcəyəm. Bununla da ölkədə əmin-amanlıq olacaq”.
Aqşin Kərimov
