“Masazır qəsəbəsində məcburi köçkünlər üçün tikilən binalar ən müasir standartlar çərçivəsində tikilib”. Bu sözləri Modern.az-a açıqlamasında Qaçqın və Məcburi Köçkünlərin İşləri üzrə Dövlət Komitəsinin mətbuat xidmətinin rəhbəri Elçin Qədimov deyib. O, Dövlət Neft Akademiyasının yataqxanasında yerləşən bir qrup məcburi köçkünün etiraz aksiyası keçirərək, onlara verilən mənzillərin həddən artıq kiçik olması məsələsinə münasibət bildirərkən qeyd edib:
”Həmin binalar ən böyük kvadrat metrlərlə hesablanmış layihələrdir. Bina müasir standartlar səviyyəsində tikilib. Daimi olaraq 24 saat isti və soyuq su ilə təchiz olunub. Narazılığın heç bir əsası yoxdur”.
E.Qədimov bildirib ki, evlər qanunvericilik çərçivəsində püşkatma yolu ilə verilir. “Kimsə artıq mənzil istəyir, amma mənzillər ailə tərkibinin sayına uyğun verilir. 2 nəfərə 1 otaqlı, 3-4 nəfərə 2 otaqlı, 5-6 nəfərə 3 otaqlı, 7-dən çox üzvü olan ailəyə 4 otaqlı mənzil verilir. Bunlar hamısı qanunvericiliklə tənzimlənən işlərdir. Komissiya püşkatma yolu ilə mənzilləri, binaları, mərtəbələri müəyyənləşdirir”.
Hazırda orada komissiyanın işlədiyini deyən Elçin Qədimov bildirib ki, onlara edilən müraciətlər yerindəcə araşdırılır. “Kiminsə nədənsə narazılığı varsa komissiyaya yerində müraciət edir, baxılır və qanunvericilik çərçivəsində tədbir görülür”.
Bu gün bir qrup məcburi köçkün Mirəli Qaşqay küçəsi ilə Bakıxanov küçələrinin kəsişməsindəki yolu bağlayıb. Məcburi köçkünlər onlara verilən mənzillərin ədalətsiz şəkildə bölüşdürülməsinə etiraz edirlər, tikilən binalarda mənzillərin əvvəlki şəhərciklərdəkindən çox kiçik olduğunu bildiriblər. Aksiya yerinə polis qüvvələri cəlb olunub.
Aytən ƏLİYEVA
