Milli Şuranın ötən gün keçirilən növbəti sessiyası qalmaqallarla yadda qaldı. 6 saatdan çox davam edən iclasın əsas müzakirə predmeti Şuranın alternativ namizəd məsələsi idi. MŞ gərgin müzakirələrdən sonra bu istiqamətdə qərarını verdi.
Koalisiyanın bu qərarı Milli Şuranı iki hissəyə parçaladı. Bu addımı dəstəkləyənlər də oldu, Rüstəm İbrahimbəyova alternativ görməyənlər də.
Xüsusən son iclasda müxalifətin “əbədi” müttəfiqləri olan AXCP ilə Müsavat arasında münasibətlərin yaxşı olmadığını hiss olunurdu.
Dünən alternativ namizəd məsələsində partiyalar arasında növbəti qalmaqal yarandı. Müsavat seçkilərdə iştirak tərəfdarı olduğu halda, cəbhəçiləri isə “Nuh deyir, peyğəmbər demir” misalına əlində bayraq tutaraq yalnız Rüstəm İbrahimbəyovun namizədliyini sonadək müdafiə edəcəklərini deyirdilər.
Müsavat başqanının müavini Gülağa Aslanlı Modern.az-a açıqlamasında partiyalar arasında yaranan münasibətlərdən söz açaraq Müsavatın düzgün mövqedə olduğunu bəyan edib:
“Biz dünənki sessiyada öz mövqeyimizi açıq-aşkar bəyan elədik. Bildirdik ki, əlavə namizədə ehtiyac var. Cəmil Həsənli, Rafiq Əliyev, Mehman Əliyev. Bunlardan hansı ehtiyat namizəd olaraq seçilərsə, biz də bunu dəstəkləyəcəyik. Bizim məqsədimiz seçkilərdə iştirak eləməkdir”.
AXCP isə müttəfiqindən fərqli mövqedədir. Partiya funksioneri Fuad Qəhrəmanlı alternativ namizəd ideyasına qarşı çıxıb. Onun sözlərinə görə, Milli Şura bir neçə namizədlə seçkiyə gedəcəksə bu, artıq Milli Şura demək deyil:
“Milli Şura vahid namizəd ideyası əsasında yaranmış bir qurumdur. Milli Şuranın əhəmiyyəti vahid namizədlə bağlıdır. Əgər bir neçə namizəd olacaqsa Milli Şuranın heç bir anlamı qalmır. Rüstəm İbrahimbəyov seçkiyə qatılmayacağı təqdirdə qarşımızda iki variant qalır.
Bir çoxları Milli Şuranın vahid namizəd kimi üzərinə götürdüyü öhdəlikləri yerinə yetirmirlər”.
Xəbər verdiyimiz kimi, cəbhəçilərlə-müsavatçıların qovğasına qarşın eks-spiker Rəsul Quliyev də Milli Şuranın alternativ namizəd qərarına qarşı çıxdığını deyib.
Anar RÜSTƏMOV
